استانانىڭ باس جوسپارى قايتا قارالىپ، جىل سوڭىنا دەيىن بەكىتىلەدى

استانا. قازاقپارات - ەلوردانىڭ باس جوسپارى قايتا قارالىپ، وعان وزگەرىستەر مەن تولىقتىرۋلار ەنگىزىلىپ جاتىر.

بۇل تۋرالى پرەمەر-ءمينيستردىڭ ورىنباسارى التاي كولگىنوۆ ءمالىم ەتتى، دەپ حابارلايدى قازاقپارات ءتىلشىسى.

«استانالىقتاردى باسپانامەن قامتۋ وزەكتى. جىل سايىن تۇرعىن ۇيلەرگە دەگەن سۇرانىس ارتىپ كەلەدى. وسى ورايدا، استانانىڭ باس جوسپارىنا وزگەرىستەر ەنگىزۋدى قولعا الدىق، سەبەبى قولدانىستاعى جوسپار ەسكىردى. قولدانىستاعى باس جوسپار بويىنشا ەلوردا حالقى 2030-جىلى 1 ميلليون 200 مىڭعا جەتۋى ءتيىس ەدى. ال، ءبىز ول كورسەتكىشكە 2020-جىلى جەتىپ قويدىق. ەلوردا حالقى ەكى ەسە ءوستى، تيىسىنشە باسپانا مەن باسقا دا قاجەتتىلىكتەر بويىنشا سۇرانىس ارتا تۇسەدى»، - دەدى التاي كولگىنوۆ ۇكىمەت ءۇيىنىڭ كۋلۋارىندا تىلشىلەردىڭ سۇراعىنا جاۋاپ بەرە تۇرىپ.

ۇكىمەت باسشىسى ورىنباسارىنىڭ دەرەگىنشە، جاڭارتىلعان باس جوسپاردى جىل سوڭىنا دەيىن بەكىتۋ جوسپارلانىپ وتىر.

«استانا قالاسىنىڭ العاشقى باس جوسپارى 2000-جىلداردىڭ باسىندا قابىلداندى، 2010-جىلى وعان تۇزەتۋلەر ەنگىزىلدى. سودان بەرى وزگەرگەن ەمەس. جاڭارتىلىپ جاتقان باس جوسپار 2035-جىلعا دەيىنگى ۋاقىتتى قامتيدى»، - دەيدى ول.

بۇعان دەيىن التاي كولگىنوۆ ەلوردادا تۇرعىن ءۇي قۇرىلىسىنىڭ قارقىنىن ازايتۋعا قاتىستى پىكىر بىلدىرگەن ەدى.