استانا ىرگەسىندە اشىق اسپان استىنداعى ەڭ ۇلكەن مۋزەي سالىنىپ جاتىر
مادەنيەت جانە سپورت مينيسترلىگىنىڭ مالىمەتىنشە، مۋزەي-قورىقتىڭ اۋماعى - 412 گەكتار. بۇل اشىق اسپان استىندا ورنالاسقان ەلىمىزدەگى ەڭ ۇلكەن مۋزەي بولادى.
«قازىرگى كەزدە مۋزەي اۋماعىنا قوس قاپتالدان كىرۋگە ارنالعان بيىكتىگى 7 مەتردەن اساتىن كىرەبەرىس قاقپا مەن بەكىنىس قابىرعالارىنىڭ قۇرىلىسى باستالدى. كىرەبەرىس پەن بەكىنىستەگى مۇنارالار سول كەزەڭدەگى تەحنولوگيا بويىنشا ارنايى جاسالعان قۇرىلىس ماتەريالدارىمەن قاپتالادى.
جوبانىڭ نەگىزگى ماقساتى - اشىق اسپان استىنداعى مۋزەيدە دالا وركەنيەتىنىڭ وزىق جەتىستىكتەرىن كورسەتۋ»، - دەلىنگەن مينيسترلىك مالىمەتىندە.
مۇندا بوزوق قالاشىعىمەن قاتار، ەنەوليت داۋىرىنەن ورتا عاسىرلارعا دەيىنگى تاريحي كەشەندەردىڭ تاريحي رەكونسترۋكتسياسى بوي كوتەرەدى. ءار كەشەندە ماتەريالدىق جانە رۋحاني مادەنيەتتىڭ قالىپتاسۋ تاريحى كورسەتىلەدى: ساراي كەشەندەرى، عيباداتحانالار، تۇرعىن ۇيلەر، مەتاللۋرگيالىق جانە قىش پەشتەر، ۇستاحانالار مەن شەبەرحانالار، قولونەرشىلەر ورامى، ورتاعاسىرلىق بازار، پەتروگليفتەر جانە تاعى باسقاسى.
بولاشاقتا بوزوك يننوۆاتسيالىق جوبا رەتىندە ەلوردانىڭ عانا ەمەس ەلىمىزدىڭ تۋريستىك كارتاسىندا تارتىمدى مادەني ينفراقۇرىلىمعا اينالادى دەپ كۇتىلۋدە. تاريحي-مادەني جوبا شاعىن جانە ورتا بيزنەستى دامىتۋعا، جاڭا جۇمىس ورىندارىن قۇرۋعا سەرپىن بەرمەك.
«بۇگىنگى جاستار كوزبەن كورىپ، قولمەن ۇستاۋعا بولاتىن اقپاراتتى جاقسى قابىلدايدى. جاڭا فورماتتاعى مۋزەي ولارعا سول ءداۋىردىڭ اتموسفەراسىن، حالىقتىڭ تۇرمىسىن تولىق سەزىنۋگە جانە دالا وركەنيەتىنىڭ وزىق مادەنيەتىمەن تانىسۋعا مۇمكىندىك بەرەدى. بۇل جوبا بولاشاقتا قازاقستاننىڭ تانىمال تۋريستىك برەندتەرىنىڭ بىرىنە اينالاتىنى انىق. مۋزەي-قورىق اشۋ ىشكى جانە كەلۋ ءتۋريزمىن دامىتۋعا مۇمكىندىك بەرەدى، ەلوردا ءوڭىرىنىڭ ينۆەستيتسيالىق تارتىمدىلىعىن جاقسارتادى، قازاقستاننىڭ ەۋرازيانىڭ دالالىق تاريحىنىڭ ساقتاۋشىسى رەتىندەگى حالىقارالىق ءيميدجىنىڭ وسۋىنە وڭ ىقپال ەتەتىن بولادى»، - دەدى ق ر م س م «بوزوق» مەملەكەتتىك تاريحي-مادەني مۋزەي-قورىعىنىڭ ديرەكتورى ساۋلە بورىبايەۆا.
