قازاقستاندىق دومبىراشىلار يتاليادا باس جۇلدە الدى
«روزا باعلانوۆا اتىنداعى قازاقكونسەرت» م ك و سوليستەرى مادەنيەت جانە سپورت مينيسترلىگىنىڭ قولداۋىمەن يتاليانىڭ پەسارو قالاسىنا بارىپ ونەر كورسەتكەن.
جىل سايىن پەسارو قالاسىندا وتەتىن Open Italy-2023 شاراسىنا 24 ەلدەن قاتىسۋشى جينالعان. ولاردىڭ اراسىندا قازاقستاندىق دۋەت ۇزدىك دەپ تانىلدى.
«ءبىزدىڭ دۋەت «اداي»، «كوروعلى» ، «ءالقيسسا» كۇيلەرىن، و. سۇلەيمەنوۆتىڭ West شىعارماسىن ورىنداپ، قازىلار القاسى مەن كورەرمەندەردى باۋراپ الدى. تەمىرلان مەن ەرناتتى جارقىن جەڭىسىمەن قۇتتىقتايمىن. جىگىتتەردىڭ قازاق مۋزىكاسىن ورىنداي وتىرىپ، حالىقارالىق دەڭگەيدە جەتىستىككە جەتكەنى قۋانتادى. ولاردىڭ ونەرى باسقا تالانتتى وتانداستارىمىزدى شابىتتاندىراتىنىنا سەنىمدىمىن»، - دەپ قۇتتىقتادى مادەنيەت جانە سپورت ءمينيسترى اسحات ورالوۆ Telegram جەلىسىندە.
ايتا كەتەيىك، تەمىرلان مەن ەرنات استاناداعى قازاق ۇلتتىق ونەر ۋنيۆەرسيتەتىندە وقىعان جانە «باستاۋ» دومبىراشىلار دۋەتى بولىپ تانىلعان.
ولار 2018 -جىلى لاتۆيا استاناسى ريگادا وتكەن «ەۋروپا مۋزىكالىق اسپاپتار» بايقاۋىنىڭ باس جۇلدەسىن يەلەنىپ، گولليۆۋدقا جولداما الدى. سول جىلى يزرايلدە يەرۋساليمدە وتكەن «الەم مۋزىكاسى» حالىقارالىق مۋزىكا فەستيۆالىندە باس جۇلدە جەڭىپ الدى. تۇركيادا وتكەن BRIDE TV تەلەارناسىنىڭ مۋزىكالىق فەستيۆالىندە «ەڭ ۇزدىك مۋزىكالىق توپ» دەگەن ارنا ماراپاتىن يەلەندى.
