قازاقستان اسكەرى بيىل قانداي بىرلەسكەن اسكەري جيىندارعا قاتىسادى

استانا. قازاقپارات - قازاقستان اسكەريلەرى بيىل ەكى حالىقارالىق اسكەري جيىنعا قاتىسادى. بۇل تۋرالى ق ر قارۋلى كۇشتەرى باس شتابى جەدەل جوسپارلاۋ دەپارتامەنتى باستىعىنىڭ ورىنباسارى داۋرەن ابدۋللين ورتالىق كوممۋنيكاتسيالار قىزمەتىندە وتكەن بريفينگىدە ايتتى، دەپ حابارلايدى قازاقپارات ءتىلشىسى.

«بيىل بەلورۋس اۋماعىندا وقۋ-جاتتىعۋ جيىندارى جوسپارلانعان. ءدال وسى وقۋ-جاتتىعۋ جيىندارى بىلتىر ۇ ق ش ۇ- نىڭ بىرلەسكەن ارەكەتتەر جوسپارى اياسىندا قازاقستان اۋماعىندا وتكەن بولاتىن. بيىلعى جيىنعا ءبىزدىڭ قارۋلى كۇشتەردەن جەكە قۇرامنىڭ 80 گە جۋىق كونتينگەنتى تارتىلادى. ودان بولەك، كورشىلەس قىرعىز رەسپۋبليكاسى اۋماعىندا «مىزعىماس باۋىرلاستىق» وقۋ-جاتتىعۋ جيىندارىنا دا جەكە قۇرامنىڭ 130 ادامى، 30 عا دەيىن اسكەري تەحنيكا تارتىلادى»، - دەدى ول.

قارۋلى كۇشتەر پولكوۆنيگى «باتىل تويتارىس» جيىنى بيىل قىركۇيەك ايىندا وتەتىنىن ايتتى.

«قالعان جيىندار قازاقستاننىڭ ءوز اۋىماعىندا، ءوزىمىزدىڭ جاتتىعۋ پوليگوندارىمىزدا وتەدى. ولاردىڭ ىشىندەگى ەڭ ىرىلەرىنىڭ ءبىرى - «باتىل تويتارىس» كەشەندى ۆەدومستۆوارالىق ستراتەگيالىق كوماندالىق- شتابتىق وقۋ-جاتتىعۋى. ول بيىل قىركۇيەك ايىنا جوسپارلانعان. ونىڭ اياسىندا «شىعىس-2023» جەدەل-تاكتيكالىق وقۋ-جاتىتعۋ جيىندارى وتەدى»، - دەدى داۋرەن ابدۋللين.

ال باس شتاب باستىعى – ق ر قارۋلى كۇشتەرى قۇرلىق اسكەرلەرى باس قولباسشىسىنىڭ ءبىرىنشى ورىنباسارى قانىش ابۋباكىروۆتىڭ سوزىنشە، قازاقستان اسكەريلەرى بيىل دا بىرنەشە بىتىمگەرلىك جيىنعا قاتىسادى.

«ءبىزدىڭ قارۋلى كۇشتەر وقۋ-جاتتىعۋ جيىندارىنان بولەك بىرلەسكەن بىتىمگەرلىك جيىندارعا قاتىسادى. ولاردىڭ ىشىندە امەريكا قۇراما شتاتتارى، ۇلىبريتانيا، يتاليا، تۇركيا، ءۇندىستان جانە وزبەكستان سياقتى ەلدەر بار. 10 جىلدان استى، بىتىمگەرلىك جيىندار اياسىندا «دالا بۇركىتى» وقۋ جاتتىعۋ- جيىندارى ءوتىپ كەلە جاتىر. سونداي-اق، ءبىز «كەمبريدج ءپاترۋلى» دەيتىن بارلاۋشىلار وقۋ-جاتتىعۋ جيىندارىنا قاتىسامىز. بۇلاردىڭ ءبارى اسكەريلەردىڭ ءبىلىم-بىلىگىن ارتتىرىپ، وزگە ەلدەردىڭ وزىق تاجىريبەسىن الماسۋعا باعىتتالعان»، - دەدى باس شتاب باستىعى.