ايگۇل دەپ اتىن وزگەرتكەن. جاپون قىزى جەتى ايدا قازاق ءتىلىن ۇيرەنىپ العان

استانا. قازاقپارات – جۋرناليست مارفۋعا شاپيان الەۋمەتتىك جەلىدەگى پاراقشاسىندا جەتى ايدا قازاق ءتىلىن ۇيرەنگەن جاپون قىزى تۋرالى ايتتى.

ميساكي ەسىمدى جاپون قىزى قازاق ءتىلىن قالاي ۇيرەنگەنى تۋرالى ايتاتىن ۆيدەو الەۋمەتتىك جەلىدە 387 مىڭنان اسا قارالىم جيناعان. ونىڭ سوزىنشە، قازاق ۇلتتىق ۋنيۆەرسيتەتىندە جەتى ايدان بەرى قازاق ءتىلىن ۇيرەنىپ ءجۇر.

«قازاقستاندى وتە جاقسى كورەمىن. جەتى جىل بۇرىن العاش رەت الماتىعا كەلدىم. سول كەزدە قاتتى ۇنادى. سوندىقتان ءبىرىنشى ورىسشا ۇيرەنىپ باستادىم. ءبىراق وتە قيىن جانە قازاقتارمەن جاقىنىراق بولۋ ءۇشىن قازاق ءتىلىن ۇيرەندىم»، - دەيدى ول.

بالا كۇنىمدە اتاقتى اۆار اقىنى راسۋل عامزاتوۆتىڭ «مەنىڭ داعىستانىم» اتتى كىتابىن وقىدىم. وقىدىم دا، سوناۋ كاۆكاز ەتەگىندەگى وسى ءبىر تاۋ حالقىنا عاشىق بولدىم. اقىننىڭ اۆار تىلىنە دەگەن ماحابباتى مەنىڭ دە ءوز انا تىلىمە دەگەن سۇيىسپەنشىلىگىمدى ارتتىرعان ەدى. داعىستاندى كورۋگە قۇمارتتىم... ءجا، ول بولەك اڭگىمە. سول «مەنىڭ داعىستانىم» ۇقتىرعان دۇنيە - ءبىر ۇلتتىڭ جانىن ۇققىڭ كەلسە، ونىڭ ءتىلىن ۇيرەنۋ قاجەتتىگى. سودان بولار، انا ءتىلىمدى بىلەتىن باسقا ۇلت، مەنىڭ جانىمدى، قازاقى بولمىسىمدى تۇسىنەتىندەي كورىنەدى دە تۇرادى. كەزەكتى اۋىزاشاردىڭ بىرىندە تانىسقان جاپون قىزى ميساكيمەن سويلەسە كەلە ونىڭ «باسىندا ورىس ءتىلىن ۇيرەندىم. سوسىن قازاققا جاقىن بولۋ ءۇشىن قازاق ءتىلىن وقي باستادىم» دەگەن ءسوزى جۇرەگىمدى جىلىتتى. ءوزارا اڭگىمەنىڭ ءبىر ۇزىگىن سىزدەرگە دە ۇسىنىپ وتىرمىن. ءارقاشان جولىڭ بولسىن، قازاققا جانى قۇمار جاپون قىزى، ميساكي!

ول قازاقتاردىڭ قاي قاسيەتى ۇناعانىن ايتتى.

«ادامدار ۇنادى. وتە مەيىرىمدى جانە قوناقجاي»، - دەيدى ميساكي. ميساكيدىڭ سوزىنشە، وعان قازاق تاعامدارى ىشىنەن ەت، قازى ۇناعان. «بەشبارماق، قازاقتىڭ ەتى ۇنايدى. قازى دا ۇنادى»، - دەدى ول.

جاپون قىزى وزىنە ايگۇل دەگەن ەسىم تاڭداپ العان.

«مەنىڭ شىن اتىم - ميساكي. «مي» دەگەننىڭ ماعىناسى - «ادەمى» دەگەن ءسوز. ال «ساكي» دەگەن گۇل سياقتى. سوندىقتان «ادەمى گۇل» دەگەن اتتى قازاقشا اتتاردان ىزدەپ، ايگۇلدى تاپتىم»، - دەيدى ول ەسىمىنىڭ تاريحى تۋرالى.

ايگۇلدىڭ الدا قازاقستانعا قاتىستى جوسپارلارى دا بار ەكەن.

«قازىر جاپونيادا قازاقستان تۋرالى ەشكىم بىلمەيدى. سوندىقتان قازاقستاندى كوپ ادامعا تانىستىرعىم كەلەدى»، - دەيدى ول.

جەلى قولدانۋشىلارى از ۋاقىت ىشىندە قازاق تىلىندە تازا سويلەپ تۇرعان جاپون قىزىنا ءتانتى بولعان.

«جاپوندار تاڭعالدىرۋدان شارشامايدى»، «جاپون - قازاق ءبىر تۋعان»، «كەرەمەت! ءوز ويىن قازاق تىلىندە ەركىن ايتىپ، ەركىن جەتكىزىپ تۇر»، «وسىنداي قازاق ءتىلىن ۇيرەنەتىن جاستار كوبەيە بەرسىن! قازاق ءتىلى جاساسىن!»، «2 جىلدا تازا قازاقشا سويلەيدى عوي مىناۋ»، - دەيدى پىكىر جازعاندار.

Massaget.kz