تاڭعى اس ىشپەسە اعزاعا نە بولادى؟

استانا. قازاقپارات – كەيبىر ادامدار ارتىق سالماقتان ارىلۋ ماقساتىندا، ۋاقىت تاپشىلىعىنان نەمەسە تابەتتىڭ بولماۋىنان تاڭعى اس ىشپەي جۇرە بەرەدى.

الايدا تاڭعى اس - ەڭ ماڭىزدى تاماقتانۋ كەزى. ءجيى تاڭعى اس ىشپەۋ اعزاعا قالاي اسەر ەتۋى مۇمكىن؟

مەتابوليزم باياۋلايدى

تاماقتى قانشالىقتى ءجيى جەسەڭىز، زات الماسۋ سونشالىقتى جىلدام جۇمىس ىستەيدى. سول ءۇشىن دە ارىقتاۋ بويىنشا ماماندار از-ازدان، ءبىراق كۇنىنە 5-6 رەت تاماق ءىشۋدى ۇسىنادى. سول سەكىلدى، كەرىسىنشە، تاماقتى قانشالىقتى سيرەك جەسەڭىز، سونشالىقتى مەتابوليزم باياۋ جۇمىس ىستەيدى. سول ءۇشىن تاڭعى اس ىشپەۋ ارقىلى ارىقتامايسىز، كەرىسىنشە سالماق قوسىپ الۋىڭىز مۇمكىن.

قانداعى قانت دەڭگەيى بىردەن وزگەرەدى

دۇرىس تولىققاندى تاڭعى اس قانداعى قانت دەڭگەيىن تۇراقتاندىرادى. ال تاڭعى اس ىشپەۋ، كەرىسىنشە، قانت دەڭگەيىنىڭ بىردەن وزگەرۋىنە اكەلەدى. سونىڭ سالدارىنان، ديابەتتىڭ دامۋ قاۋپى ارتادى.

يممۋنيتەت السىرەيدى

پايدالى تاڭعى اس دۇرىس يممۋندى جاۋاپتىڭ بولۋىنا ىقپال ەتەدى. ال تاڭعى اسسىز ءجۇرۋ اعزانى السىرەتىپ جىبەرۋى مۇمكىن.

شاش تۇسە باستاۋى مۇمكىن

ادام تاڭعى اس ۋاقىتىندا جەتكىلىكتى مولشەردە اقۋىز جەمەسە، بۇل اعزانىڭ كەراتين (شاش پەن تىرناققا ارنالعان قۇرىلىس ماتەريالى) ءبولۋىن شەكتەيدى.

كەشكى استا تاماق كوپ جەپ قويۋىڭىز مۇمكىن

ادەتتە، تاڭعى اس ىشپەيتىن ادامدار كەشكى استا كوپ تاماقتانادى. ال كەش تاماقتانۋ نەمەسە كەشكى استا كوپ تاماق جەۋ استىڭ دۇرىس قورىتىلماۋىنا، ۇيقىنىڭ بۇزىلۋىنا جانە ارتىق سالماق قوسىپ الۋعا ىقپال ەتۋى مۇمكىن.

اقپارات دەرەككوزى: https://massaget.kz/layfstayl/zhadnama/82275/