جەتىسۋ وبلىسىنىڭ اكىمدىگى جارتى ميلليارد تەڭگەگە جۋىق قارجىعا كولىك الماق
«جەتىسۋ وبلىسىنىڭ باسقارمالارىندا كولىكتەر بار. ءبىراق ەسكى. سونىمەن قاتار كەيبىر باسقارمالاردا اۆتوكولىك مۇلدەم جوق. مىسالعا تۋريزم، جەر، تاعى ءبىر ەكى باسقارمادا كولىك جوق» ، - دەدى جەتىسۋ وبلىسى اكىمدىگى اپپاراتى قارجى شارۋاشىلىق ءبولىمىنىڭ باسشىسى تالاپ شاۋحاروۆ.
جالپى جەتىسۋ وبلىسىنىڭ اكىمدىگىندە 23 باسقارما بار. ونىڭ تەك ۇشەۋىندە عانا اۆتوكولىك جوق. ءبىراق جەتىسۋ وبلىسىنىڭ اكىمدىگى بىردەن 23 باسقارمانىڭ بارلىعىنا، ودان بولەك ءماسليحاتقا، اكىم اپپاراتىنا جاڭا تەمىر تۇلپار الماق. قازىر وسى 28 كولىكتى ساتىپ الۋ ءۇشىن 469 ميلليون تەڭگەگە تەندەر جاريالاعان. ونداعى ءاربىر كولىكتىڭ باعاسى 16 ميلليون 750 مىڭ تەڭگەگە بەلگىلەنگەن.
ال پارلامەنت ءماجىلىسىنىڭ دەپۋتاتى قاراقات ابدەننىڭ ايتۋىنشا، ەلدەگى مەملەكەتتىك قىزمەتكەرلەر قىزمەتتىك كولىكتەرىنەن ءتۇسىپ، استانالىق شەنەۋنىكتەر سياقتى تاكسيگە ءمىنۋ كەرەك. سوندا بيۋدجەت شىعىنى بەس ەسەگە دەيىن ازايادى. جانە بۇل الەمدىك تاجىريبەدە دە بار.
دەپۋتاتتىڭ سوزىنشە، قازىر قاجەت ەمەس شىعىنداردى قىسقارتىپ، ۇنەمدەۋ تاسىلدەرىن ەنگىزگەن دۇرىس. جىل سايىن قىمبات كولىكتەردى الماستىرىپ، جاڭارتىپ ساتىپ الۋ، جۇرگىزۋشىلەرگە اي سايىن جالاقى تولەۋ، ءارى كولىكتەردىڭ كۇتىمى مەن سالىعىنا، جوندەۋ جۇمىستارى كەتەتىن اقشا - ۇلكەن شىعىن.
سونداي- اق، دەپۋتات ەگەر اكىمدىك راسىمەن دە كولىككە مۇقتاج بولسا، قولجەتىمدى، قىمبات ەمەس ءارى وتاندىق وندىرۋشىلەردىڭ كولىكتەرىن تاڭداعان ءجون ەكەنىن ايتتى.
ايتا كەتسەك، جۋىقتا پرەزيدەنتتىڭ ءوزى دە شەنەۋنىكتەرگە حالىقتىڭ جاعدايىن ءبىلۋ ءۇشىن كولىكتەرىنەن ءتۇسىپ، جاياۋ جۇرۋگە كەڭەس بەرگەن ەدى.
