ۇلىتاۋ وبلىسىندا ءبىر اۋىلدىڭ تۇرعىندارى تۇگەل ىشىمدىكتەن باس بارتتى

ۇلىتاۋ. قازاقپارات - ۇلىتاۋ وبلىسى جاڭاارقا اۋدانىنداعى ساكەن سەيفۋللين اۋىلىنىڭ تۇرعىندارى الكوگولدى سۋسىنداردان باس تارتقان. «اشى سۋدان» ارىلعالى اۋىلدا ءبىر دە ءبىر رەت قىلمىس پەن ءتارتىپ بۇزۋ فاكتىلەرى تىركەلمەگەن، دەپ حابارلايدى قازاقپارات ءتىلشىسى.

مۇنداي شەشىمدى ساكەن سەيفۋللين اۋىلىنىڭ تۇرعىندارى ءوز ەركىمەن قابىلداعان، ەشكىم ماجبۇرلەمەگەن. باستاماشى - اۋىل جاستارى.

الدىمەن «اشى سۋ» داستارحاننان كەتسە، سوڭىندا دۇكەن سورەلەرىنەن دە مۇلدەم جوعالعان.

جەرگىلىكتى كاسىپكەرلەر الكوگول ونىمدەرىن ساتۋدى جانە جەتكىزۋدى توقتاتقان. ول ءۇشىن اۋىلداستارىنان شەكسىز العىس الىپ، قۇرمەتكە يە بولىپ وتىر.

«ءبىزدىڭ جاستار وتە بەلسەندى. ءبارىمىز الكوگول سۋسىندارىن ىشۋگە قارسىمىز. سپيرتتىك ىشىمدىكتەن باس تارتۋدىڭ ناتيجەسىندە اۋىلىمىزدا تىنىشتىق ورنادى»، - دەيدى اۋىل تۇرعىندارىنىڭ ءبىرى.

اۋىل تۇرعىندارىنىڭ دەنساۋلىعىنان باسقا، الكوگولدەن باس تارتۋ ءتارتىپ ورناۋ كورسەتكىشتەرىن جاقسارتۋعا ىقپال ەتكەن.

سوڭعى ءۇش جىلدا ءبىر دە ءبىر قۇقىقبۇزۋشىلىق تىركەلمەگەن.

«ءبىزدىڭ اۋىلدىق وكرۋگتىڭ قۇرامىنا 3 ەلدى مەكەن كىرەدى. وندا 1000-عا جۋىق ادام تۇرادى. وسى جىلدار ىشىندە اۋىل تۇرعىندارى سپيرتتىك سۋسىنداردان باس تارتقاننان بەرى بىردە- ءبىر قۇقىق بۇزۋشىلىق بولعان جوق. ءبىزدىڭ جاستار مال شارۋاشىلىعىمەن اينالىسادى جانە تىنىمسىز ەڭبەك ەتەدى»، - دەيدى ساكەن اۋىلىنىڭ ۋچاسكەلىك ينسپەكتورى ساكەن كارتايەۆ.

اۋىل تۇرعىندارىنىڭ ايتۋىنشا، جەرگىلىكتى حالىقتىڭ ەشقايسىسى ەسىگىن قۇلىپتامايدى ەكەن، ويتكەنى ۇرلىق جوق.

جاستار سپورتپەن نەمەسە اۋىل شارۋاشىلىعىن دامىتۋمەن اينالىسادى.

مال شارۋاشىلىعىنىڭ قارقىندى ءوسىپ جاتقانىنا شاعىن اۋىلدا جۇمىس ىستەيتىن 85 شارۋا قوجالىعى دالەل.