تاماقتىڭ كالورياسىن مازىرگە جازىپ قويۋ قاتەرلىك ىسىكتەن بولاتىن مىڭداعان ءولىمنىڭ الدىن الادى

استانا. قازاقپارات - مەيرامحانا مازىرىنە تاعامنىڭ قۇندىلىعىن قوسۋ مىڭداعان ادامنىڭ ءومىرىن امان الىپ قالادى جانە ميللياردتاعان دوللار شىعىندى ۇنەمدەۋگە مۇمكىندىك بەرەدى، دەپ حابارلادى قازاقپارات جاڭا زەرتتەۋگە سىلتەمە جاساپ.

2018 -جىلى ا ق ش- تا جاڭا زاڭ قابىلداندى. ونىڭ تالابى بويىنشا 20 نەمەسە ودان دا كوپ ورىندارى بار مەيرامحانالار مەن فاستفۋد جەلىلەرى مازىرگە تاعامنىڭ كالورياسىن جازىپ قويۋعا ءتيىس.

بۇل زاڭ قازىردىڭ وزىندە ءار تاعامنىڭ قۋاتىنىڭ 20-60 كالورياعا تومەندەۋىنە اكەلدى.

تافتس ۋنيۆەرسيتەتىنىڭ ماماندارى جۇرگىزگەن زەرتتەۋگە سۇيەنسەك، بۇل ساياسات 20-65 جاس ارالىعىنداعى ادامدار اراسىندا سەمىزدىكتەن تۋاتىن كەم دەگەندە 28000 قاتەرلى ىسىكتىڭ الدىن الادى دەپ بولجانىپ وتىر.

سونىمەن قاتار قاتەرلى ىسىكتەن بولاتىن 16700 ولىمگە توسقاۋىل بولادى جانە دەنساۋلىق ساقتاۋ مەن الەۋمەتتىك شىعىندارعا كەتەتىن 2,8 ميلليارد دوللار (2,55 ميلليارد ەۋرو) اقشانى ۇنەمدەيدى.

بولجام بويىنشا، بۇل جاڭاشىلدىق قاتەرلى ىسىكتىڭ مىنا تۇرلەرىنەن بولاتىن ءولىم- ءجىتىمنىڭ الدىن الادى: باۋىر (4530) ، پوستمەنوپاۋزاداعى ءسۇت بەزى (3080) ، ەندومەتريا (2060) ، بۇيرەك (1980) ، ۇيقى بەزى (1230) .

الدىڭعى زەرتتەۋلەر بۇل ساياساتتىڭ ا ق ش- تىڭ ەرەسەك تۇرعىندارى اراسىندا جۇرەك- قانتامىر اۋرۋلارى مەن 2 ءتيپتى قانت ديابەتىنىڭ الدىن الاتىنىن كورسەتتى، ءبىراق سەمىزدىكتەن تۋاتىن قاتەرلى ىسىكتىڭ مەديتسينالىق جانە ەكونوميكالىق اسەرى بۇرىن باعالانباعان.

«ءبىز تۇتىنۋشىلارعا، ساياساتكەرلەرگە جانە كاسىپكەرلەرگە كىشىگىرىم وزگەرىستەردىڭ ۇلكەن ارتىقشىلىقتارعا قالاي اكەلەتىنىن كورسەتۋىمىز كەرەك، - دەيدى زەرتتەۋدىڭ جەتەكشى اۆتورى، تافتس ۋنيۆەرسيتەتىنىڭ فريدمان مەكتەبىنىڭ تاماقتانۋ ەپيدەميولوگياسى جانە دەرەكتەر عىلىمى عىلىمدارىنىڭ كانديداتى مەنگسي دۋ.

BMJ Open جۋرنالىندا جاريالانعان زەرتتەۋ اۆتورلارى 20-44 جاس ارالىعىنداعى جاستار مەن ەرەسەكتەر ءۇشىن مۇنىڭ پايداسى كوپ دەيدى، ويتكەنى وسى توپتاعىلار سەمىزدىككە بايلانىستى قاتەرلى ىسىك اۋرۋلارىنا ءجيى ۇشىرايدى.

عالىمدار قوعامنىڭ بارلىق سالالارىنداعى ادامدار تاڭبالاۋ ساياساتىنان پايدا كورۋى ءۇشىن ءالى دە كوپ نارسە ىستەۋ كەرەك ەكەنىن اتاپ ءوتتى.

زەرتتەۋە سايكەس، سەمىزدىكتەن تۋاتىن قاتەرلى ىسىك - قازىرگى ۋاقىتتا ۇلى بريتانيادا جاڭادان دياگنوز قويىلعان بارلىق قاتەرلى ىسىك اۋرۋلارىنىڭ شامامەن 40 پايىزىن قۇرايدى.

ءاربىر ءۇشىنشى امەريكالىق سەمىزدىككە شالدىققان، ال سەمىزدىك - قاتەرلى ىسىكتىڭ 13 ءتۇرى ءۇشىن بەلگىلەنگەن ءقاۋىپ فاكتورى.

ەۋروپا وداعى بىرنەشە جىل قاتارىنان ازىق- تۇلىك پاكەتتەرىنە ولاردىڭ تاعامدىق قۇندىلىعىن مىندەتتى تۇردە كورسەتكەنىمەن، ەۋروپانىڭ كوپتەگەن ەلدەرىندە ءالى كۇنگە دەيىن مەيرامحانا مازىرىندە كالوريا كورسەتىلمەگەن.

يرلانديا بۇل زاڭنىڭ قابىلدانۋى ءۇشىن ءبىراز ەڭبەكتەندى، 2015 -جىلدان بەرى قاراستىرىلىپ كەلدى دە، كەيىن ۇكىمەت ودان باس تارتتى.

ۇلى بريتانيادا مازىردە كالوريانى كورسەتۋ تالابى 2022 -جىلى كۇشىنە ەندى.

انگليادا 250 نەمەسە ودان دا كوپ قىزمەتكەرى بار كاسىپورىندارعا، سونىڭ ىشىندە كافە- مەيرامحانالار مەن تاماقتانۋ ورىندارى ورالماعان تاعامدار مەن الكوگولسىز سۋسىنداردىڭ كالورياسى تۋرالى اقپاراتتى كورسەتۋگە مىندەتتى.

شوتلانديا مەن ۋەلس بيلىگى بۇل قادامدى ەندى قاراسترىپ جاتىر.