شاحمات پانىنەن قاي مۇعالىمدەر جاتتىقتىرۋشى بولا الادى
وسى ورايدا، بار كادرلاردىڭ بىلىكتىلىگىن كوتەرۋ جانە جاڭا ماماندار دايارلاۋ ماسەلەسى قاراستىرىلىپ جاتىر. تولىعىراق قازاقستان شاحمات فەدەراتسياسىنىڭ ءبىرىنشى ۆيتسە-پرەزيدەنتى دارمەن ءسادۋاقاسوۆ ايتىپ بەردى، دەپ حابارلايدى قازاقپارات ءتىلشىسى.
«وقۋ-اعارتۋ، عىلىم جانە جوعارعى ءبىلىم، مادەنيەت جانە سپورت مينيسترلىكتەرىمەن بىرلەسىپ، كادر، ياعني جاتتىقتىرۋشى جانە پەداگوگتەر دايارلاۋ ماسەلەسىن تالقىلادىق. الدىمەن، شاحمات جاتتىقتىرۋشىلارىنىڭ بىلىكتىلىگىن ارتتىرۋ ماسەلەسى تۇر. تاعى ءبىر ايتا كەتەتىن جايت، باستاۋىش جانە باسقا دا پاندەر مۇعالىمدەرى ارنايى كۋرستان ءوتىپ، شاحمات جاتتىقتىرۋشىسى بولا الادى. سونىمەن قاتار، پەداگوگيكالىق جوعارى وقۋ ورىندارىندا شاحمات ءپانى مۇعالىمدەرىن دايارلاۋ ماسەلەسى قارالدى. شاحمات مەتودولوگياسى، وقۋ باعدارلاماسى جانە وقۋ- مەتوديكالىق كەشەنى بويىنشا جاڭا كادرلار دايارلاۋ ءسوز بولىپ وتىر»، - دەدى دارمەن ءسادۋاقاسوۆ ورتالىق كوممۋنيكاتسيالار الاڭىندا وتكەن باسپا ءسوز ءماسليحاتىندا.
سونداي-اق، سپيكەر شاحمات بويىنشا وقۋلىق، جۇمىس داپتەرى جانە مەتوديكالىق ادىستەمە ازىرلەۋ جوسپارلانىپ جاتقانىن تىلگە تيەك ەتتى.
«بۇگىندە اتالعان باعىتتاعى جۇمىس حالىقارالىق ساراپشىلاردىڭ قاتىسۋىمەن جۇرگىزىلىپ جاتىر. شاحماتتى باستاۋىش سىنىپتاردا فاكۋلتاتيۆ ءپان رەتىندە ەنگىزۋدى بەلگىلى ءبىر وڭىرلەردەن باستايمىز. جوبا وڭ ناتيجە بەرسە، ونى ەنگىزۋ اياسىن كەڭەيتە تۇسەمىز»، - دەيدى ول.
بۇعان دەيىن حابارلاعانىمىزداي، شاحمات 1-4- سىنىپ وقۋشىلارى اراسىندا فاكۋلتاتيۆ ءپان رەتىندە ەنگىزىلمەك.
