يسپانياداعى قازاق دياسپوراسى نەمەن اينالىسىپ ءجۇر
بۇل رەتتە «قازاقپارات» اگەنتتىگىنىڭ تىلشىسىنە ەۋروپاداعى قازاق دياسپوراسىنىڭ ءومىرى جايىندا «يسپانياداعى قازاق ءۇي - Casa kazaja en España» قاۋىمداستىعىنىڭ جەتەكشىسى جاننات نۇربايەۆا بايانداپ بەردى.
- جاننات امانگەلدى قىزى، ءوزىڭىز باسقارىپ وتىرعان قاۋىمداستىق تۋرالى تانىستىرىپ وتسەڭىز. قاۋىمداستىقتىڭ نەگىزگى باعىتى قانداي؟
- «يسپانياداعى قازاق ءۇي - Casa kazaja en España» قاۋىمداستىعى - مادەني-اعارتۋشىلىق باعىتتاعى كوممەرتسيالىق ەمەس ۇيىم جانە ءوز جۇمىسىن 2022-جىلدىڭ 15- اقپانىندا باستادى. بۇگىندە ءبىز ءۇش نەگىزگى ماقساتتى اۋديتوريامەن جۇمىس ىستەيمىز: يسپانيادا 15-20 جىلدان استام تۇراتىن قازاق وتباسىلارى، كەيىنگى 5 جىلدا كەلگەن قازاقتار، سونداي-اق يسپانيادا تۇراقتى وقيتىن نەمەسە اكادەميالىق ۇتقىرلىق باعدارلامالارى بويىنشا كەلگەن قازاقستاندىق ستۋدەنتتەر.
ارينە، ۇيىمنىڭ باستى ماقساتى - يسپانياداعى قازاقتاردىڭ وسكەلەڭ ۇرپاعى اراسىندا تاريحي ءداستۇرىن، ءتىلىن، جالپى، قازاقستاننان تىس جەرلەردەگى قازاق مادەنيەتىن، ۇلتتىق بولمىسىن ساقتاۋ. سونىمەن قاتار، قاۋىمداستىق قىزمەتىنىڭ نەگىزگى باعىتى ءبىلىم بەرۋگە قاتىستى. بۇل تۇرعىدا مادەنيەتتى ساقتاۋ ءۇشىن قازاق ءتىلى كۋرستارىن وتكىزۋ، جاقىندا كەلگەندەردىڭ بەيىمدەلۋىن جەڭىلدەتۋ باعىتىندا يسپان ءتىلىن وقىتۋ ەسكەرىلگەن.
سونىمەن قاتار، SIELE ەمتيحانىن (Servicio Internacional de Evaluación de la Lengua Española - حالىقارالىق يسپان ءتىلىن مەڭگەرۋ دەڭگەيىن باعالاۋ قىزمەتى) وتكىزۋگە ليتسەنزيانىڭ بولۋىنا بايلانىستى ءبىزدىڭ قاۋىمداستىقتىڭ ءبىلىم بەرۋ قىزمەتتەرىنىڭ اۋقىمى ارتتى.
مۇنىمەن قوسا، ءبىزدىڭ جۇمىستا مادەني بۇقارالىق ءىس- شارالار وتكىزۋ قاراستىرلعان. اشىلعانىمىزعا كوپ ۋاقىت وتپەگەنىنە قاراماستان، «يسپانياداعى قازاق ءۇي - Casa kazaja en España» قاۋىمداستىعى ەۋروپالىق نەمەسە حالىقارالىق دەڭگەيدەگى سەزدەر مەن كەزدەسۋلەرگە قاتىستى. ماسەلەن، 2022-جىلى پاريجدە وتكەن ەۋروپا قازاقتارىنىڭ قۇرىلتايىنا قاتىستىق. اتاپ ايتقاندا، 2023-جىلى قازاق ءۇيى قاۋىمداستىعى گەرمانيانىڭ كەلن قالاسىندا وتەتىن كەلەسى قۇرىلتايعا قاتىسۋدى جوسپارلاپ وتىر.
سونىمەن قاتار، 2022 جانە 2023-جىلدارى ءوزىمىز ناۋرىزدى اتاپ وتتىك. مادريدتەگى ديزاين جانە تەحنولوگيا ۋنيۆەرسيتەتىمەن (UDIT) بىرلەسە وتىرىپ، ءتيىستى الەۋمەتتىك جوبا مەن قازاق جاستارىنا ارنالعان «قازاق ويۋى» مادەني جوباسى ۇيىمداستىرىلدى.
- قاۋىمدىقتىڭ نەشە مۇشەسى بار؟
- قازاقستاندىقتار بىرلەستىگىنە يسپانيانىڭ ءتۇرلى ايماقتارىندا تۇراتىن 100 دەن استام ادام كىردى. وتباسىلاردىڭ كوبىسى مادريد، توريەۆەحا، بارسەلونا، سان-سەباستيان جانە ۆالەنسيا قالالارىندا تۇرادى. مەن يسپانيادا 23 جىلدان استام ۋاقىت تۇرىپ جاتىرمىن. قوعامدىق تۇرعىداعى جۇمىستارىما توقتالسام، قازاق، يسپان، ورىس تىلدەرىن وقىتۋمەن اينالىسامىن. يسپانيا قازاقتارىنىڭ اتىنان قۇرىلتايلارعا، كونفەرەنتسيالارعا، ەۋروپالىق جانە الەمدىك دەڭگەيدەگى باس قوسۋلارعا قاتىسامىن.
- يسپانياداعى وتانداستارىمىز نەمەن اينالىسادى؟
- قاۋىمداستىق مۇشەلەرىنىڭ اراسىندا مىقتى زاڭگەرلەر، بيزنەسمەندەر، سونداي-اق بەلگىلى اۋدارماشىلار، ينجەنەرلەر، سۋرەتشىلەر، اكتەرلەر، كينورەجيسسەر جانە باسقا دا ماماندىقتاردى مەڭگەرگەن ادامدار بار.
ولاردىڭ ءارقايسىسى ءوز سالاسىندا قازاقستاننىڭ وڭ يميدجىن قالىپتاستىرۋعا ەرەكشە ۇلەس قوسىپ كەلەدى. تاعى ءبىر ايتا كەتەرلىك جايت، قازاق جاستارىنا ۇنەمى ءوزىنىڭ اقىلىن ايتىپ، كەڭەس بەرىپ وتىراتىن قاريالار بار.
ءبىزدىڭ قاۋىمداستىقتىڭ قۇرامىنا قازاقتىڭ اتاقتى سۋرەتشىلەرى - تولقىن ساقبايەۆا مەن داۋرەن قاستەيەۆ سياقتى تالانتتى ادامدار ەنگەن. قازىر تورريەۆەياداعى Vega تەاترىنىڭ كوركەمدىك جەتەكشىسى قىزمەتىن فاتيما جاندوسوۆا اتقارىپ جاتسا، رەال مادريد قورىنىڭ رەسمي وكىلى رەتىندە اينۇر مۇقانوۆا تانىمال بولىپ وتىر. ال، دينارا شاڭگەرەي اۋدارماشى جانە يسپانيا مەن قازاقستان اراسىنداعى مەملەكەتتىك باعدارلامالاردىڭ ۇيلەستىرۋشىسى قىزمەتىندە ءجۇر. ەلتاي كوشەكوۆ ەسىمدى ازامات كاسىپكەر، زاڭگەر، سونداي-اق Madrid company ءارى REAL اگەنتتتىگىنىڭ نەگىزىن قالاۋشى.
اعا بۋىن وكىلدەرى اراسىندا اۋەسكۇل ارىپبايەۆا مەن اسپەت ساقبايەۆا قوعام قايراتكەرلەرى رەتىندە بەلگىلى. ولار مادەنيەت پەن ءداستۇر بويىنشا كەڭەسشى قىزمەتىن اتقارىپ وتىر.
ءبىر جىل جۇمىس بارىسىندا ءبىزدىڭ بىرلەستىگىمىز «وتانداستار قورىمەن»، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىمەن، بۇكىل ەۋروپاداعى قازاق دياسپوراسىمەن، يسپانياداعى اسىراپ الىنعان قازاق بالالارى ۇيىمىمەن، قازاقستان رەسپۋبليكاسىنىڭ يسپانياداعى ەلشىلىگىمەن، سەرۆانتەس ينستيتۋتىمەن، ديزاين جانە تەحنولوگيا ۋنيۆەرسيتەتىمەن (UDIT) جانە باسقا دا ۇيىمدارمەن ىنتىماقتاستىق ورناتقانىن ايتا كەتكەن ءجون.
الداعى ۋاقىتتا ءبىرقاتار ءىس-شارانى وتكىزبەكپىز. ونىڭ ىشىندە يسپانيانىڭ ۇلتتىق كىتاپحاناسىمەن جانە قازاق بالالارى ۇيىمىمەن بىرلەسىپ اباي شىعارماشىلىعىنا ارنالعان جوبانى ىسكە اسىرماقپىز. سونداي-اق ورازا ايت مەرەكەسىنە قاتىستى جينالماقپىز.
قاۋىمداستىق اياسىندا ءوز يدەيالارىمىزدى الەۋمەتتىك جەلىلەر ارقىلى (Instagram: casa.kazaja.es) تاراتىپ جاتىرمىز. بۇل رەتتە ونى يسپانياعا بارۋدى جوسپارلاپ وتىرعان قازاقستاندىق ستۋدەنتتەرگە ارنالعان اقپاراتتىق پلاتفورما، سونىمەن قاتار يسپاندىقتار مەن باسقا دا شەتەلدىكتەرگە قازاق مادەنيەتىن تانىستىرۋ الاڭى رەتىندە پايدالانىپ جاتىرمىز.
ۇيىمنىڭ تۇپكىلىكتى يدەيالارىنىڭ ءبىرى - قازاق ءۇيىن قۇرۋ. بىرىنشىدەن، وندا وڭتۇستىك ەۋروپانىڭ تۇكپىر- تۇكپىرىنەن كەلگەن قازاقتار ءۇشىن مادەني ءىس-شارالار وتكىزۋگە بولادى. ەكىنشىدەن، شەتەل ازاماتتارىنا قازاقستانمەن، داستۇرىمىزبەن، تاريحىمىزبەن جانە تىلىمىزبەن كەڭىنەن تانىسۋعا مۇمكىندىك جاسالادى.
- اڭگىمەڭىزگە راقمەت.
اۆتور: رۋسلان عابباسوۆ
