ەلوردادا بەيمالىم ەر ادام كراننىڭ باسىنا شىعىپ الدى

استانا. قازاقپارات - استانادا بەلگىسىز ەر ادام كراننىڭ باسىنا شىعىپ العان. قازىر ونىڭ سەبەبى انىقتالىپ جاتىر، دەپ حابارلايدى قازاقپارات ءتىلشىسى قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«24-ءساۋىر ساعات 11.39-دا «102» ارناسىنا بەلگىسىز ەر ادامنىڭ كران مۇناراسىنا شىعىپ العانى تۋرالى حابار كەلدى. وقيعا ورنىنا جەدەل قىزمەت جىبەرىلدى. قوعامدىق ءتارتىپتى بۇزۋشى ءىس-ارەكەتىنىڭ سەبەبى انىقتالىپ جاتىر. ونىڭ ناتيجەسى بويىنشا قۇقىقتىق باعا بەرىلەدى»، - دەلىنگەن رەسمي حابارلامادا.

ەسكە سالساق، وتكەن جىلى استانادا وسىعان ۇقساس جاعداي بولعان ەدى. كەيىن كران باسىنا شىققان ەر ادام 5 تاۋلىككە قامالدى.

ەر ادام تاراز قالاسىنىڭ قۇقىق قورعاۋ ورگاندارىمەن ارادا تۋىنداعان پروبلەماعا نازار اۋدارۋ ماقساتىندا قۇرىلىس كرانىنىڭ توبەسىنە شىعىپ العان.