ون ءتورت جاسار اسپاز: ءوز مەيرامحانامدى اشقىم كەلەدى
جاس فۋد-بلوگەر ءارى اسپاز قازاقپارات تىلشىسىنە عالامتوردا قالاي تانىمال بولعانىن، بوس ۋاقىتىندا نەمەن اينالىساتىنىن جانە نە سەبەپتى اسپاز ونەرىن تاڭداعانىن ايتىپ بەردى.
دۋلات الماتى قالاسىندا دۇنيەگە كەلدى. ءۇيدىڭ كەنجەسى. الدىندا ءۇش باۋىرى بار. قازىر №181 ورتا مەكتەپتىڭ 8-سىنىبىندا وقيدى.
«وسىدان ءۇش جىل بۇرىن عالامتوردان تانىمال اسپازداردىڭ ۆيدەولارىن كورە باستادىم. ۋاقىت وتە كەلە تاماق پىسىرۋگە دەگەن قىزىعۋشىلىعىم ارتا ءتۇستى. اسىرەسە، تۇرىك اسپازدارى بۋراك وزدەمير، نۋسرەت گوكچە جانە بريتاندىق گوردون رامساي مەنى قاتتى شابىتتاندىردى. كەيىن مەن دە ۆيدەو ءتۇسىرۋدى قولعا الدىم. بۇل ىستە ماعان اعام دياس كومەكتەسەدى»، - دەيدى وقۋشى بالا.
دۋلات 2020 -جىلى العاش رەت اعىلشىن دەسەرتى-ترايفلعا تاپسىرىس الدى. قازىر جاس اسپاز ءتۇرلى تاعام دايىندايدى. عالامتور ارقىلى رەتسەپتىلەرىمەن بولىسەدى. ونىڭ الەۋمەتتىك جەلىدە ۇلكەن اۋديتورياسى بار. بۇگىندە Instagram جەلىسىندە 620 مىڭنان استام جازىلۋشىسى بار.
«سونداي-اق مەن مەيرامحانالارعا شولۋ تۇسىرەمىن، اسپازدارعا كومەكتەسەمىن. ولاردان ۇيرەنگەن دۇنيەمدى وقىرماندارىما كورسەتۋگە تىرىسامىن. ۇيدە اتا-انام، اعالارىم كومەكتەسەدى. اس ۇيدە كوپ تاجىربيە جاسايمىن. الەۋمەتتىك جەلىلەرگە ارنالعان ءبىر ۆيدەونى تۇسىرۋگە 3-4 ساعات كەتەدى. بۇل وڭاي پروتسەسس ەمەس. ول مۇقيات دايىندىقتى قاجەت ەتەدى. ءبىز كۇندە كەشكى ۋاقىتتا ۆيدەو تۇسىرەمىز. بۇل مەنىڭ وقۋىما كەدەرگى كەلتىرمەيدى»، - دەيدى دۋلات.
ايتۋىنشا، جاس اسپاز قازىر تاپسىرىس قابىلدامايدى، قالا مەيرامحانالارىمەن تىعىز بايلانىستا جۇمىس ىستەيدى. جارنامادان تابىس تابادى. ءوزىن عانا ەمەس، جاقىندارىن دا سىيلىقتارمەن قۋانتادى. ءوزىنىڭ تۋعان كۇنىندە قىمبات سمارتفون ساتىپ الدى. بۇل جاڭالىعىمەن ول Instagram - داعى پاراقشاسىندا ءبولىستى.
«مەن ءاۋ باستان اقشا تابۋدى ماقسات ەتپەدىم، تەك سۇيىكتى ىسىممەن اينالىستىم. العاشقى ەكى جىلدا تابىس تۇسكەن جوق. ال قازىر اقشا جارنامادان تۇسەدى. ەگەر ادام ءوزىنىڭ سۇيىكتى ىسىمەن جان- تانىمەن اينالىسسا، ونىڭ ناتيجەسى مىندەتتى تۇردە بولادى. مەنىڭ ۆيدەولارىم بىرتە- بىرتە كوپ قارايتىن بولدى. الەۋمەتتىك جەلىدەگى پاراقشاما جازىلعاندار سانى ارتتى. وقىرماندارىم جۇمىسىمدى جوعارى باعالاپ، قولداۋ كورسەتەدى. ول ماعان موتيۆاتسيا بەرەدى. مەن بلوگىمدى ەكى تىلدە جۇرگىزەمىن، ءبىراق كوبىنە ورىس تىلىندە، ويتكەنى مەنى باسقا ەلدەردىڭ ادامدارى دا كورەدى. مەنىڭ اۋديتوريامنىڭ 60 پايىزى قازاقستاندىقتار، قالعانى شەتەلدىكتەر»، - دەيدى ول.
دۋلات تاماق پىسىرۋمەن قاتار مۋزىكا مەن سپورتتى جاقسى كورەدى. ول گيتارادا ويناپ، بوكس پەن ارالاس جەكپە- جەكپەن شۇعىلدانادى. شىعىس تاعامدارىن جاقسى كورەدى. جاقىندا ول تانىمال اسپازداردى كورۋ ءۇشىن بىرىككەن اراب امىرلىكتەرىنە باردى.
«ءبىز جاقىندا دۋبايدا بولدىق. تۇرىك اسپازدارىمەن تانىسقىم كەلدى، ءبىراق، وكىنىشكە وراي، ءساتى تۇسپەدى. الايدا، بولاشاقتا مىندەتتى تۇردە كەزدەسەمىن»، - دەدى ول.
قازىر ونى كوشەدە ادامدار تانىپ، بىرگە فوتوعا ءتۇسۋىن سۇرايدى.
«ءيا، كوشەدە ادامدار مەنى تانىپ جاتادى، بىرگە سۋرەتكە ءتۇسۋىمدى سۇرايدى، مەن وتە ريزامىن. مەكتەپتە دوستارىمنىڭ ءبارى دە مەنى قولدايدى، ولارمەن جاقسى قارىم- قاتىناستامىز، ولارمەن بالا كەزدەن دوسپىز، سوندىقتان تانىمالدىققا اسا ءمان بەرمەيمىن»، - دەيدى جاس اسپاز.
دۋلات قاراپايىم وتباسىنان شىققان، اناسى مەدبيكە، ال اكەسى جەكە تاكسي جۇرگىزۋشىسى. بولاشاقتا الماتىدا ءوز مەيرامحاناسىن اشۋدى ماقسات ەتىپ وتىر. ول ءۇشىن تاجىريبە جيناقتاپ، ايانباي ەڭبەك ەتۋ كەرەك.
View this post on Instagram
