قاراعاندىلىقتار ەندى اۆتوبۋستاردا ەلەكتروندى كىتاپ وقي الادى
كىتاپ وقۋ ءۇشىن جولاۋشىلاردىڭ سمارتفوندارى ينتەرنەتكە قوسۋلى بولسا جەتكىلىكتى، دەپ حابارلايدى قازاقپارات ءتىلشىسى.
اۆتوبۋستارداعى ەلەكتروندى كىتاپحانا قالالىق اكىمدىكتىڭ قولداۋىمەن «جول ۇستىندەگى كىتاپحانا» جوباسى اياسىندا جابدىقتالعان. ازىرگە QR كودتارى بويىنشا كىتاپ وقۋ وپتسياسى التى باعىتتاعى 22 اۆتوبۋستا قول جەتىمدى – 65، 5، 1، 70، 43، 118. قازاق، ورىس جانە شەتەل ادەبيەتتەرىنىڭ تۋىندىلارىمەن تانىسۋ ءۇشىن جولاۋشىلارعا اۆتوبۋس سالونىنىڭ ورتالىق بولىگىندەگى ستيكەرلەردە ورنالاستىرىلعان QR- كودتى سكانەرلەۋ جەتكىلىكتى.
«جىلجىمالى كىتاپحانا كوركەم ادەبيەتتى وقۋدى ناسيحاتتاۋ ءۇشىن جابدىقتالعان. قازاق، ورىس جانە شەتەلدىك كلاسسيكا سەكىلدى ءۇش بولىمنەن تۇراتىن كىتاپتى تاڭداۋ ءۇشىن جولاۋشى سىلتەمە بويىنشا ءوتۋ كەرەك. شىعارمالاردىڭ ىشىنەن م. اۋەزوۆتىڭ «كوكسەرەك»، ا. قۇنانباي ۇلىنىڭ «ەسكەندىر»، ا. س. پۋشكيننىڭ ەرتەگىلەرى، ارتۋر كونان دويلدىڭ «جوعالعان الەم» جانە باسقا دا كىتاپتاردى تاڭداۋعا بولادى. جوباعا باعىتتارى ۇزاق جانە جولاۋشىلار اعىنى مول مارشرۋتتار تارتىلدى» ، - دەيدى قالا اكىمدىگىنىڭ باسپا ءسوز قىزمەتى.
جاقىن ارادا ەلەكتروندى كىتاپحانالار 13 مارشرۋتتاعى 60 قالالىق اۆتوبۋستا بولادى. ءنومىرى 65، 5، 1، 70، 43، 118-دەن باسقا، قوسىمشا 40، 53، 33، 146، 56، 41، 19 اۆتوبۋستاردا بار. كىتاپحانانىڭ سيفرلىق مۇراعاتىندا بارلىعى 41 تۋىندى بار. ونىڭ ىشىندە 21 - قازاق كلاسسيكاسى، 14 - شەتەلدىك جانە 6 - ورىس كلاسسيكاسى.
