تۇركيادا جەر سىلكىنىسىنەن زارداپ شەككەندەرگە جاڭا ۇيلەردىڭ كىلتى تابىس ەتىلدى
تۇركيا پرەزيدەنتى رەجەپ تايىپ ەردوعان گازيانتەپ پروۆينتسياسىنىڭ نۋرداگى اۋدانىنىڭ بەلپىنار اۋىلىندا، كاحرامانماراش پروۆينتسياسىنىڭ مەستحيۋيۋك جانە تۇركوعلى وزبەك اۋىلدارىندا جەكە ۇيلەردىڭ كىلتىن تاپسىرۋ راسىمىنە قاتىستى.
پرەزيدەنت سالتاناتتى شاراعا قاتىسۋشىلاردى رامازان مەرەكەسىمەن قۇتتىقتادى.
«6-اقپانداعى جويقىن جەر سىلكىنىسىنەن 15 كۇن وتكەن سوڭ، جاڭا ۇيلەردىڭ فۋندامەنتى قالاندى. اپات ايماعىندا بارلىعى 507 مىڭ پاتەر مەن 143 مىڭ جەكە ءۇي سالىنادى. ولاردىڭ 319 مىڭى بيىل تاپسىرىلادى. 60 مىڭعا جۋىق پاتەردىڭ فۋندامەنتى قالاندى. بۇل جۇمىستار ۇزدىكسىز جالعاسۋدا. ءبىزدىڭ مىندەتىمىز جەر سىلكىنىسىنەن زارداپ شەككەن ازاماتتاردى مۇمكىندىگىنشە تەزىرەك جاڭا زاماناۋي ۇيلەرگە كوشىرۋ»، - دەدى پرەزيدەنت.
ول اپات ايماعىنداعى بارلىق قالالار مەن اۋىلداردىڭ ينفراقۇرىلىمى جاڭارتىلىپ جاتقانىن اتاپ ءوتتى. بۇل باعىتتا بىرنەشە مەملەكەتتىك باعدارلاما قابىلداندى. ولاردىڭ ءبىرى فەرمەرلەردى پايىزسىز نەسيەلەرمەن قامتاماسىز ەتۋگە باعىتتالعان.
مەملەكەت باسشىسى گازيانتەپتە جوسپارلانعان 50 مىڭ پاتەرگە قوسىمشا تاعى 50 مىڭ پاتەر سالىناتىنىن ايتتى.
پرەزيدەنت ەردوعان جاڭا ءۇي يەلەرىنە كىلتتەرىن تابىستاپ، جەر سىلكىنىسىنەن زارداپ شەككەن ازاماتتاردى بارلىق باعىتتا قولداۋ كورسەتىلەتىنىن ايتتى.
ايتا كەتەيىك، تۇركيادا ءالسىن-ءالسىن جەر سىلكىنىسى بۇگىنگى كۇنگە دەيىن تىركەلىپ وتىر.
جويقىن ەكى ءزىلزالا 6-اقپاندا تۇركيانىڭ كاحرامانماراش پروۆينتسياسىندا بولدى. ماگنيتۋداسى 7 بالدان استى. تەربەلىس ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا سەزىلدى. وسى تابيعي اپاتتان تۇركياعا كەلگەن شىعىن 105 ميلليارد دوللاردان استى.
تۇركيادا 6-اقپان – 31-ناۋرىز ارالىعىندا 22,5 مىڭ جەراستى ءدۇمپۋى تىركەلدى.
سوڭعى رەسمي دەرەكتەرگە سايكەس، ءزىلزالا 50096 ادامنىڭ ءومىرىن قيدى. 107204 ادام زارداپ شەكتى.
