باكالاۆرياتقا «بولاشاق» باعدارلاماسىمەن گرانت ءبولۋ قايتا جاڭعىرادى

استانا. قازاقپارات - عىلىم جانە جوعارى ءبىلىم ءمينيسترى ساياسات نۇربەك «بولاشاق» مەملەكەتتىك باعدارلاماسىنا قاتىستى بىرنەشە جاڭاشىلدىقتى جاريا ەتتى، دەپ حابارلايدى قازاقپارات ءتىلشىسى.

«بولاشاق» باعدارلاماسى كەرەك. ءبىز قازىر ونى وزگەرتىپ جاتىرمىز. ءيا، بۇرىن بۇقارالىق باعدارلاماعا اينالىپ كەتتى، ءبىراز ادامدار باردى. الداعى وزگەرىستەرگە كەلسەك، «بولاشاق» باعدارلاماسىندا باكالاۆرياتتى قايتارامىز، ول وسىدان 12-13 جىل بۇرىن جابىلعان ەدى. ەلىمىزدە سوڭعى ۋاقىتتا دارىندى، ءبىلىمدى وقۋشىلار الەمنىڭ ءتۇرلى ۋنيۆەرسيتەتىنەن كوپتەگەن شاقىرتۋ الادى. الەمنىڭ جوعارى وقۋ ورىندارى دارىندى بالالاردى حالىقارالىق وليمپيادا جانە عىلىمي جوبالارى جەڭىمپازدارىنىڭ اراسىنان تاڭداپ الادى»، - دەدى ساياسات نۇربەك ءتىلشى نارتاي ارالباي ۇلىنىڭ بەرگەن سۇحباتىندا.

ونىڭ ايتۋىنشا، ەندى ەلىمىزدىڭ دارىندى بالالارىن «بولاشاق» باعدارلاماسى ارقىلى شەتەلگە ءبىلىم الۋعا جىبەرۋ جوسپارلانىپ وتىر.

«باستى تالاپ - ولار ەلگە قايتۋى كەرەك. ايتپەسە، ءبىزدىڭ التىن باستى بالالارىمىز شەتەلگە اعىلىپ جاتىر. بۇل باستاما كەلەسى جىلى ىسكە قوسىلادى. سونىمەن قاتار گرانتتاردىڭ باسىم بولىگى تەحنيكالىق ماماندىقتارعا بەرىلەدى. باعدارلاماعا قاتىستى تاعى ءبىر جاڭاشىلدىق، بۇعان دەيىن كونكۋرس جاريالانادى، وعان كەز كەلگەن ادام قاتىسا الاتىن ەدى. ەندى ءبىز وتاندىق ءىرى كومپانيالارعا بارىپ، ولاردان قانداي ماماندار كەرەكتىگىن سۇراپ شىعامىز. ولار ءوتىنىش بىلدىرەدى، سونىڭ نەگىزىندە ءبىز تاپشى دەگەن مامانداردى شەتەلدە وقىتىپ بەرەمىز»، - دەيدى ول.

سونداي- اق، مينيستر «بولاشاق» باعدارلاماسى بويىنشا گرانتتار سانى شەكتەلىپ، ساپاعا ەرەكشە ءمان بەرىلەتىنىن ايتتى.