بۇقتىرمادا ءتۋريزمدى دامىتۋ ءۇشىن جاعاجاي اباتتاندىلىلىپ، جاڭا ساياباق سالىنباق
بۇعان دەيىن ءوڭىردىڭ ءىنجۋ- مارجانى سانالىپ كەلكەن الاكول قازىر شىعىس قازاقستاننان ءبولىنىپ شىققان اباي وبلىسىنىڭ قۇرامىندا. ەندى ايماق ءتۋريزمىن بۇقتىرما جاعالاۋىندا دامىتۋ كوزدەلىپ وتىر.
وسى ماقساتتا قانداي جۇمىستار اتقارىلاتىنىن اقپارات ورتالىعىندا وتكەن باسپا ءسوز ءماسليحاتىندا وبلىستىق كاسىپكەرلىك جانە يندۋستريالىق- يننوۆاتسيالىق دامۋ باسقارماسى باسشىسىنىڭ ورىنباسارى مارات قاباقوۆ ايتىپ بەردى.
«بۇقتىرماداعى ءتۋريزمدى دامىتۋ جۇمىستارى 3 كەزەڭدە جۇرگىزىلەدى. ءبىرىنشى كەزەڭ بيىل باستالادى. وندا التاي اۋدانى جاڭا بۇقتىرما كەنتىنىڭ ورتالىق بولىگىن اباتتاندىرۋمەن اينالىسامىز. بۇگىنگى تاڭدا جولداردى كۇردەلى جوندەۋ جانە كوشەلەردى اباتتاندىرۋ بويىنشا جوبالار ازىرلەندى. سونداي- اق، ساياباق پەن سەرۋەندەۋ ايماقتارىن جارىقتاندىرۋ، كوگالداندىرۋ جۇمىستارى جۇرگىزىلەدى»، - دەيدى ول.
كەلەسى جىلدىڭ سوڭىنا دەيىن جالعاساتىن جوبانىڭ ەكىنشى كەزەڭىندە «اربات» جاياۋ سەرۋەندەۋ ايماعى سالىنىپ، قوعامدىق جاعاجاي اباتتاندىرىلماق.
«جۇمىستار جەر ۋچاسكەلەرى راسىمدەلگەننەن كەيىن باستالادى. جەردى الۋ مەرزىمى - وسى جىلدىڭ مامىر ايىنىڭ باسى. سودان سوڭ وكتيابرسكيي كەنتىندەگى قولدانىستاعى ءورت ءسوندىرۋ دەپوسىنىڭ اۋماعىندا 2 اۆتوكولىككە ارنالعان ءورت ءسوندىرۋ بەكەتى مەن گاراج بوكسىن سالۋ كوزدەلىپ وتىر»، - دەيدى م. قاباقوۆ.
ونىڭ ايتۋىنشا، ءۇشىنشى كەزەڭدە جاڭا بۇقتىرما كەنتىندە جاڭا ساياباق سالىنادى. وندا ويىن الاڭدارى، ۆەلو- سەرۋەندەۋ ايماعى، قوعامدىق تاماقتاناتىن ورىندار، كونتسەرتتىك ساحنا جانە ساۋلەتتىك نىساندار بولادى.
