وسكەمەندە سۇلۋلىق سالونىندا بلەفاروپلاستيكا جاساتقان ايەل كوز جۇمدى

وسكەمەن. قازاقپارات - وسكەمەن قالاسىندا سۇلۋلىق سالونىندا قاباعىن ادەمىلەگىسى كەلگەن ايەل كوز جۇمدى، دەپ حابارلايدى قازاقپارات ءتىلشىسى.

وسكەمەندە 61 جاستاعى ايەل قاباعىن ادەمىلەۋ ءۇشىن بلەفاروپلاستيكا جاساتپاق بولعان. سۇلۋلىق سالونىندا اتالعان پروتسەدۋرانى ليتسەنزياسى جوق مامان جاساعان. بۇل تۋرالى قالالىق پروكۋراتۋرانىڭ باسپا ءسوز قىزمەتى حابارلاپ وتىر.

«سالون قىزمەتكەرى مەديتسينالىق جانە كوسمەتولوگيالىق قىزمەتپەن اينالىسۋعا ەشقانداي ليتسەنزياسى بولماسا دا، كليەنتكە بلەفاروپلاستيكا جاسادى. ءبىراز ۋاقىتتان كەيىن ايەل ادام اۋىرىپ، شۇعىل تۇردە اۋرۋحانانىڭ جانساقتاۋ بولىمىنە جەتكىزىلدى»، - دەلىنگەن اقپاراتتا.

الدىن الا مالىمەت بويىنشا، ايەل انافيلاكتيكالىق شوكتان كوز جۇمدى.

«وسى فاكتىگە وراي، قازاقستان رەسپۋبليكاسى قىلمىستىق كودەكسىنىڭ 322-بابى 3-بولىگىمەن (انىقتاماسى جانە (نەمەسە) ليتسەنزياسى جوق ادامنىڭ مەديتسينالىق نەمەسە فارماتسيەۆتيكالىق قىزمەتپەن اينالىسۋىنىڭ ابايسىزدا ادام ولىمىنە اكەلىپ سوعۋى) بويىنشا سوتقا دەيىنگى تەرگەۋ امالدارى باستالدى. سالون قىزمەتكەرى 5 جىلعا دەيىنگى مەرزىمگە باس بوستاندىعىنان ايىرىلۋى مۇمكىن»، - دەلىنگەن حابارلامادا.