بيلىكتى ءجونسىز سىناپ، بەدەلىن ءتۇسىرىپ تاستادىق - ءماجىلىس دەپۋتاتى
بيلىككە قاتىستى سىن ماسەلەسىن ءماجىلىس دەپۋتاتى اناس باققوجايەۆ Jibek Joly تەلەارناسىنداعى «JJ Talk» باعدارلاماسىنىڭ ەفيرىندە قوزعادى، دەپ حابارلايدى قازاقپارات ءتىلشىسى.
«ءبىز اكىمدەردى ءجونسىز سىنايمىز. ولاردى كىم سىناي الادى؟ اكىمدىكتىڭ بيۋجەتىن كورىپ، قانشا قاراجاتى بولدى، ول جۇمسالدى ما، جۇمسالماسا وعان نە سەبەپ - سوعان كوز جەتكىزىپ بارىپ ايتۋ كەرەك. مەنىڭ ايتپاعىم، وكىنىشكە قاراي، ءبىز بيلىكتى ابدەن، ءجونسىز سىناي بەرىپ، ونىڭ بەدەلىن ءتۇسىرىپ تاستادىق. ەگەر اكىمدەردى كىنالى دەيتىن بولساق، وندا ءسوزىمىزدى دالەلدەۋىمىز قاجەت»، - دەدى اناس باققوجايەۆ تەلەباعدارلاما ەفيرىندە.
ونىڭ ايتۋىنشا، اكىمدەر ورتالىق اتقارۋشى ورگاندار بەكىتكەن ەرەجەگە سۇيەنىپ جۇمىس ىستەيدى.
«اكىم بيۋجەتتىك كودەكسپەن جۇمىس ىستەيدى. ول ەرەجەلەرگە ءماجىلىس تىكەلەي ىقپال ەتەدى. ەگەر جۇيەنى جاقسارتىپ قويسا، وندا اكىمدەر ەشقايدا بارا المايدى. سوزدەن ىسكە كوشىپ، جۇمىس ىستەۋىمىز كەرەك. قوعامدا كوپ سىن ايتىلادى. مىسالى، اۋىل شارۋاشىلىعى سالاسىن الايىق. مينيسترلىك جۇمىس ىستەمەيدى دەپ ايتتىق، ولاي ايتۋ ءۇشىن دالەل كەرەك. مەن اۋىل شارۋاشىلىعى سالاسىنىڭ مامانىمىن، سالاعا قاتىستى پروبلەمالاردى بىلەم»، - دەيدى ول.
ايتا كەتسەك، Jibek Joly تەلەارناسىنداعى «JJ Talk» باعدارلاماسىنىڭ ەفيرىندە ءماجىلىس دەپۋتاتتارى ەل دامۋىنا قاتىستى ءبىرقاتار جايتتاردى كوتەرىپ، ۇسىنىستارىن ايتتى.
دەپۋتات ەرلان سايىروۆ مىندەتىن دۇرىس اتقارماعان مينيسترلەردى ورنىنان الۋ جونىندە ۇسىنىس ايتىلاتىنىن جانە ناقتى كانديداتتاردىڭ دا بارىن ءمالىم ەتتى.
ودان بولەك، حالىق قالاۋلىسى بۇرىنعى مينيسترلەردىڭ تابىسى مەن دۇنيە-مۇلكىن تەكسەرۋ كەرەكتىگىن العا تارتتى.
سونداي-اق، ءماجىلىس دەپۋتاتى نۇرتاي سابيليانوۆ ەلىمىزدە شاعىن جانە ورتا بيزنەستى دامىتامىز دەسەك نەسيەنىڭ 6-7 پايىزبەن بەرىلۋى تيىستىگىن اتاپ ءوتتى.
