بۇرىنعى مينيسترلەردىڭ تابىسى مەن دۇنيە-مۇلكىن تەكسەرۋ كەرەك - دەپۋتات

استانا. قازاقپارات - ەلىمىزدە بۇرىن مينيستر مىندەتىن اتقارعان ازاماتتاردىڭ جەكە تابىسى مەن مۇلكىنە تەكسەرۋ جۇرگىزۋ ۇسىنىلدى.

ول تۋرالى Jibek Joly تەلەارناسىنىڭ «JJ Talk» باعدارلاماسىنىڭ ەفيرىندە بەلگىلى بولدى، دەپ حابارلايدى قازاقپارات ءتىلشىسى.

«سىبايلاس جەمقورلىق پروبلەماسى بويىنشا ايتارىم، بالىق باسىنان ءشىريدى. ءبىز كەزىندە جوعارى بيلىكتە وتىرعان ازاماتتاردىڭ اۋزىن تىيماي، بەرى جاعىنان تىيۋ مۇمكىن ەمەس. بۇل جەردە جەمقورلىق پروبلەماسى تەك مەملەكەت پەن ونىڭ بيۋجەتىنە عانا بايلانىستى ەمەس. بۇل جەردە بانك جۇيەسى دە بار»، - دەدى ءماجىلىس دەپۋتاتى ەرلان سايىروۆ تەلەباعدارلاما ەفيرىندە.

دەپۋتاتتىڭ ايتۋىنشا، پاراقورلىقپەن كۇرەستە مينيسترلەر مەن اكىمدەردىڭ تازا ءارى ادال قىزمەت ەتۋى ماڭىزدى.

«بىزدە قاي اكىمنىڭ قانداي بيزنەسى بار ەكەنىن بۇكىل قازاقستان بىلەدى. ماعان 30 جىل بيزنەسپەن اينالىسىپ كەلە جاتقان ازامات بۇرىنعى مينيسترلەردىڭ قانداي ءۇيى، دۇنيە-مۇلكى بارىن ايتتى، قۇنى 1-1,5 ميلليون تۇرادى دەدى. «30 جىل بيزنەسپەن اينالىسىپ جۇرگەن مەن ونداي ءۇيدى الا المايمىن» دەيدى. مەنىڭ ويىمشا، سول بۇرىنعى مينيسترلەردىڭ تابىسى مەن مۇلكىن تەكسەرۋ كەرەك. قازىر زاڭ شىقتى، ەگەر مەملەكەتتىك قىزمەتكەر دۇنيە-مۇلكىن قالاي تاپقانىن دالەلدەي الماسا، وندا ونى مەملەكەتكە قايتارۋى ءتيىس. وسى باعىتتا جۇمىستى كۇشەيتۋ كەرەك»، - دەيدى ول.

بۇعان دەيىن ەرلان سايىروۆ مىندەتىن دۇرىس اتقارماعان مينيسترلەردى ورنىنان الۋ جونىندە ۇسىنىس ايتىلاتىنىن جانە ناقتى كانديداتتاردىڭ دا بارىن ءمالىم ەتكەن ەدى.