اتىراۋدى تاعى دا شاڭدى داۋىل باستى

اتىراۋ. قازاقپارات - بۇگىن اتىراۋدى تاعى دا شاڭدى داۋىل باسىپ تۇر، دەپ حابارلايدى قازاقپارات ءتىلشىسى.

اتىراۋ وبلىسىندا شاڭدى داۋىل ءجيى كوتەرىلەدى. بۇگىن، 21-ساۋىردە تاڭەرتەڭنەن بەرى جەل ەكپىنى كۇشەيىپ، شاڭدى داۋىل سوعىپ تۇر.

كەشە، 20-ساۋىردە ءوڭىر تۇرعىندارىنا 112 قىزمەتىنەن شاڭدى داۋىل بولاتىنى تۋرالى sms حابارى كەلگەن ەدى.

«قازگيدرومەت» ر م ك- نىڭ مالىمەتىنشە، اتىراۋ وبلىسىنىڭ باتىسىندا، شىعىسىندا، وڭتۇستىگىندە شاڭدى داۋىل كۇتىلگەن ەدى.

«وڭتۇستىك- شىعىستان جەل سوعادى. تۇندە وبلىستىڭ باتىسىندا، شىعىسىندا، وڭتۇستىگىندە، كۇندىز باسىم بولىگىندە ەكپىنى - 17-22 م/س. اتىراۋ قالاسىندا كەي ۋاقىتتا شاڭدى داۋىل كۇتىلەدى. وڭتۇستىك- شىعىستان جەل سوعادى، ەكپىنى 15-20 م/س بولادى» ، - دەپ حابارلادى «قازگيدرومەت» .

ەسكە سالا كەتەلىك، بۇعان دەيىن اتىراۋدا ەكىنشى كۇن قاتارىنان شاڭدى داۋىل سوعىپ تۇرعانىن حابارلاعان بولاتىنبىز.

«اتىراۋ وبلىسىندا «قازگيدرومەت» رمك فيليالىنىڭ مالىمەتىنە سايكەس جەلدىڭ ۇيىتقۋى سەكۋندىنا 17-22-مەترگە جەتەدى. كەي جەرلەردە سەكۋندىنا 25 مەترگە جەتۋى مۇمكىن. شاڭدى داۋىل سوعادى» ، - دەپ حابارلاعان بولاتىن وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى.

سونداي- اق، قاتتى جەلدىڭ سالدارىنان كاسپي جاعالاۋىنداعى قامىس ءورتى 5 كۇننەن كەيىن ءسوندىرىلدى.

كەيىن اتىراۋ وبلىسىندا كاسپيي جاعالاۋىنداعى 3 گەكتاردا قامىس بىقسىپ جاتقانىن جازعان ەدىك.

وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنشە، بۇگىن، 14 ساۋىردە جەرگىلىكتى ۋاقىتپەن ساعات 8:45 تە قامىستىڭ بىقسىپ جاتقانى انىقتالعان.

«اتىراۋ قالاسىندا ءتۇتىننىڭ ءيىسى سەزىلدى. وسىعان بايلانىستى توتەنشە جاعدايلار دەپارتامەنتىنىڭ جەدەل توبى اتىراۋ قالاسىنا جاقىن ورنالاسقان دامبى اۋىلىنان 30 شاقىرىم قاشىقتىقتاعى كاسپيي تەڭىزىنىڭ جاعالاۋىنا بارلاۋ جۇرگىزدى. جەدەل توپ تەڭىز جاعالاۋىنا جەتكەن كەزدە قامىستىڭ ورتەنبەگەنىن انىقتادى. الايدا، «اقجايىق» مەملەكەتتىك تابيعي رەزەرۆاتىندا شامامەن 3 گەكتار اۋماقتا قامىستىڭ تامىرى بىقسىپ جاتىر» ، - دەپ حابارلادى دەپارتامەنتتىڭ قوعاممەن بايلانىس توبى.