ءماجىلىس دەپۋتاتى سىنىپ جەتەكشىلەرىنىڭ ورنىنا ارنايى مامان الۋدى ۇسىندى

استانا. قازاقپارات - ءماجىلىس دەپۋتاتى نارتاي سارسەنعاليەۆ مەكتەپتەردە سىنىپ جەتەكشىلەرىنىڭ ورنىنا ارنايى مامان الۋدى ۇسىندى، دەپ حابارلايدى قازاقپارات ءتىلشىسى.

ماجىلىستە ايەلدەر مەن بالالاردى تۇرمىستىق زورلىق- زومبىلىق پەن قاتىگەزدىكتەن قورعاۋ ماسەلەلەرىنە ارنالعان جيىن ءوتىپ جاتىر. وسى شارادا ءسوز العان دەپۋتات نارتاي سارسەنعاليەۆ پەدوفيلدەر تۋرالى رەسمي ستاتيستيكا مالىمەتتەرىن كەلتىردى.

«2019 -جىلعى رەسمي ستاتيستيكاعا قاراساق، قازاقستانداعى قۇقىق قورعاۋشىلاردىڭ ەسەبىندە ادام زورلاعان 2800 قىلمىسكەر، بالا زورلاعان 1350 پەدوفيل تۇرعان. 2021 -جىلى قازاقستانداعى كولونيالاردا 1861 پەدوفيل جازاسىن وتەپ جاتقان. سول جىلى قاماۋ ورىندارىنداعى 50 پەدوفيلدىڭ بوستاندىققا شىققانى تۋرالى اقپارات تارادى» ، - دەدى ول.

ءماجىلىس دەپۋتاتى بالالاردى زورلىق- زومبىلىقتان قورعاۋ ءۇشىن قابىلدانۋعا ءتيىس جۇيەلى شارالاردى ۇسىندى.

«بالالاردى زورلاعاندار كىم دەگەن سۇراق تۋىندايدى. پەدوفيلدىككە كىم بارادى دەگەن سۇراقتىڭ جاۋابىن قاراساق، بالا زورلاعانداردىڭ 77 پايىزى ءوز اكەلەرى، وگەي اكەلەرى، كورشىلەرى نەمەسە سول ءۇيدىڭ تۋىسقاندارى دەگەن اقپارات الىپ وتىرمىز.

بۇعان قارسى قانداي شارا قابىلداۋ كەرەك دەگەنگە كەلسەك، كەشەگى دەپۋتاتتىق ساۋالدا دا ايتتىق. ونىڭ ىشىندە مەكتەپتەگى سىنىپ جەتەكشىسى دەگەن قىزمەتتىڭ ورنىنا ارنايى مامان الۋ، مەكتەپ پسيحولوگتەرىن كوبەيتۋ، الەۋمەتتىك پەداگوگ دەيتىن ماسەلەنى رەتتەۋ تۋرالى ۇسىنىستار بار» ، - دەدى نارتاي سارسەنعاليەۆ.