15:05, 21 - ءساۋىر 2023 | GMT +5
الماتىدا اۆتوتۇراق اقىسى كوتەرىلەدى
الماتى. قازاقپارات - وسى جىلدىڭ قىركۇيەك ايىندا الماتىدا اۆتوتۇراق باعاسىن كوتەرۋ جوسپاردا. بۇل تۋرالى ءماسليحاتتىڭ كەزەكتەن تىس سەسسياسىندا قالا اكىمى ەربولات دوسايەۆ ءمالىم ەتتى، دەپ حابارلايدى قازاقپارات ءتىلشىسى.
«بيىل اۆتوتۇراق ورىندارىن انىقتايمىز، اۋماققا بايلانىستى تۇراق اقىسىن كوتەرەمىز. بۇل جۇمىستاردى 1 - شىلدەگە دەيىن ىستەپ ۇلگەرمەيمىز، ءبىراق قىركۇيەكتىڭ باسىندا دايىن بولۋى كەرەك» ، - دەدى ەربولات دوسايەۆ.
ايتۋىنشا، كولىك تۇراعى ءۇشىن تولەم ورنالاسقان اۋدانىنا بايلانىستى ءار ءتۇرلى بولماق.
«ماسەلەن، الاتاۋ، مەدەۋ اۋدانىندا، قۇلجا تاسجولىنا شىعا بەرىستە ءبىر تاريف بولادى دەلىك، ال تاريحي ورتالىققا جاقىن جەردە تاريفتەر كوتەرىلەدى. قاراجات بيۋدجەت كىرىسىنە جۇمسالادى. اۆتوتۇراق، ايىپپۇل مەن ءوسىمپۇلدان تۇسكەن اقشانىڭ ءبارى پروپورتسيونالدى تۇردە اۋداندارداعى «حالىق قاتىساتىن بيۋدجەت» جوباسىنا قوسىمشا اۋدارىلادى» ، - دەپ ءتۇسىندىردى قالا اكىمى.
