قىتاي ءوزىنىڭ دامۋ مودەلى نەگىزىندە الەمگە جاڭا مۇمكىندىك ۇسىنۋعا دايىن - شي جينپيڭ

اۆتور: ءاليحان اسقارشاڭحاي. قازاقپارات - قىتاي ءوزىنىڭ جاڭعىرۋ مودەلىندەگى جەتىستىكتەرى نەگىزىندە الەمگە جاڭا مۇمكىندىك ۇسىنۋعا ءازىر.

بۇل تۋرالى ق ح ر ءتوراعاسى شي جينپيڭنىڭ شاڭحايدا ءوتىپ جاتقان «قىتايدىڭ جاڭعىرۋى جانە بەيبىتشىلىك» تاقىرىبىنداعى «لانتين» فورۋمىنا قاتىسۋشىلارعا جولداعان جازباشا ۇندەۋىندە ايتىلعان، دەپ حابارلايدى قازاقپارات ءتىلشىسى.

«قىتاي ءوزىنىڭ جاڭعىرۋ جەتىستىكتەرى نەگىزىندە الەمنىڭ دامۋىنا جاڭا مۇمكىندىكتەر ۇسىنۋعا، باسقا ەلدەرمەن ىنتىماقتاستىقتى ارتتىرۋعا دايىن» ، - دەلىنگەن قىتاي باسشىسىنىڭ ۇندەۋىندە.

ال اتالعان فورۋمنىڭ اشىلۋ سالتاناتىنا قاتىسقان ق ح ر سىرتقى ىستەر ءمينيسترى شين گاڭ قىتايدىڭ جاڭا دامۋ مودەلى الەمدىك ەكونوميكاعا تىڭ سەرپىن بەرەتىنىن اتاپ ءوتتى.

ونىڭ ايتۋىنشا، قىتاي بۇگىندە 140-تان استام ەلدەر مەن ايماقتاردىڭ ءىرى ساۋدا سەرىكتەسى. كۇن سايىن الەم ەلدەرىنە 320 ميلليون دوللار تىكەلەي قىتايلىق ينۆەستيتسيا باعىتتالادى جانە اي سايىن 3 مىڭنان استام شەتەلدىك ينۆەستورلار قارجىلاندىراتىن كاسىپورىنداردى اشىپ جاتىر.

«قىتايدىڭ 1,4 ميللياردتان استام حالقى جاڭا جاڭعىرۋ جولىنا ءتۇستى. بۇل الەمدىك ەكونوميكاعا ۇلكەن سەرپىن بەرەتىنى ءسوزسىز» ، - دەپ اتاپ ءوتتى ول.

ق ح ر س ءى م باسشىسى الەم حالىقتارىنىڭ جالپى وركەندەۋى ءۇشىن بارلىق ەلدەردىڭ تەڭ قۇقىلى دامۋى قاجەت ەكەنىن ايتتى.

ونىڭ مالىمدەۋىنشە، «ءبىر بەلدەۋ - ءبىر جول» جانە جاھاندىق دامۋ باستاماسى - قىتاي تاراپىنىڭ حالىقارالىق قاۋىمداستىق ءۇشىن بىردەي دامۋ مەن وركەندەۋگە اشقان جولى. شين گاڭ «ءبىر بەلدەۋ - ءبىر جول» اياسىندا 10 ىشىندە 3 مىڭنان استام جوبانىڭ قولعا الىنعانىن ءمالىم ەتتى.