جاڭاوزەندە جارىلىستان زارداپ شەككەن ايەل ەسىن جيدى

اقتاۋ. قازاقپارات - جاڭاوزەندە جارىلىستان كەيىن ورتالىق اۋرۋحانانىڭ جانساقتاۋ بولىمىنە تۇسكەن كەلىنشەك ەسىن جيدى، دەپ حابارلايدى قازاقپارات ءتىلشىسى.

«ايەلدىڭ جاعدايى تۇراقتى اۋىر، جانساقتاۋ بولىمىندە جاتىر. جاساندى تىنىس الۋ اپپاراتىنان اجىراتىلعان. قازىر ءوزى دەمالىپ، دارىگەرلەردىڭ سۇراعىنا جاۋاپ بەرەدى. ال، جانساقتاۋ بولىمىندەگى ەكىنشى ناۋقاستىڭ جاعدايى ءالى دە اسا اۋىر دەپ باعالانىپ وتىر»، - دەدى قالالىق كوپبەيىندى اۋرۋحانانىڭ باسشىسى سەرىك اسقاروۆ.

سونداي-اق، دارىگەرلەر تراۆماتولوگيا بولىمشەسىندەگى 1 ەر ادام مەن 2 قىز بالانىڭ جاعدايلارى تۇراقتى ورتاشا ەكەنىن ايتادى. وقۋشى قىزدارمەن پسيحولوگ ماماندار جۇمىس ىستەپ جاتىر.

ايتا كەتسەك، جاڭاوزەن قالاسىنىڭ 2-مولتەك اۋدانىنداعى 2 قاباتتى ۇيدە جارىلىس بولىپ، 13 ادام زارداپ شەككەن ەدى. جارىلىستان 4 ادام قازا تاپتى.