سىر ەلىندە رەسپۋبليكالىق بايگە وتەدى
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق مادەنيەت جانە سپورت باسقارماسى باسشىسىنىڭ ورىنباسارى اسىلجان جامانقۇل مالىمدەدى، دەپ حابارلايدى قازاقپارات.
- بۇگىندە يپپودروم سايىستى وتكىزۋگە تولىق دايىن. وتكەن بايگەلەرگە قاراعاندا تىركەلگەن اتتار سانى كوپ. سايىسقا قاتىسۋشى سپورتشىلار توپ بايگە، قۇنان بايگە جانە الامان بايگە بويىنشا سىنعا تۇسەدى. جۇلدە قورى - 35600000 تەڭگە. الامان بايگەنىڭ جەڭىمپازى Astana Motors كومپانياسىنىڭ دەمەۋشىلىگىمەن اۆتوكولىك مىنەدى. بايگە وتە جوعارى دەڭگەيدە ءوتىپ، حالىقتىڭ كوڭىلىن كوتەرەدى دەپ سەنەمىز، - دەدى اسىلجان زۇلفقار ۇلى.
- اۋقىمدى دايىندىق بۇگىندە ءوز مارەسىنە جەتتى. بايگەدەن بولەك، قىز-كەلىنشەكتەرگە ارنالعان «ۇلتتىق كيىم - ۇلت اجارى» اتتى كوستيۋمدەر بايقاۋى وتەدى. بۇل بايقاۋدا ەلۋدەن اسا قاتىسۋشى باق سىنايدى. وعان قاتىساتىن بويجەتكەندەر ۇلتتىق كيىممەن شىعىپ، ءسان- سالتانات بويىنشا سىنعا تۇسەدى. جۇلدە قورى - 1 ميلليون تەڭگە. سونداي-اق جۇلدەسى 500 مىڭ تەڭگەنى قۇرايتىن قول كۇرەس، ارقان تارتۋ، گىر كوتەرۋدەن سايىستار وتكىزىلەدى، - دەيدى Kazpetrol Group-تىڭ PR مەنەدجەرى مەيرامكۇل حودجايەۆا.
- بيىل رەسپۋبليكا بويىنشا جەتى ىرىكتەۋ كەزەڭى بولادى. ال سوڭعى قورىتىندى كەزەڭ جامبىل وبلىسىندا وتەدى. ءبىرىنشى كەزەڭى 22- ءساۋىر كۇنى سىر ەلىندە باستاۋ الادى. قىزىلوردا وبلىسىنان قىرىق ات ىرىكتەپ الىندى. دايىندىعى وتە جاقسى. جالپى رەسپۋبليكا تاراپىنان 210 شاباندوز ءوز باعىن سىنايدى، - دەدى قىزىلودا وبلىستىق بايگە فەدەراتسياسىنىڭ پرەزيدەنتى ءادىلجان ىزتىلەۋوۆ.
ايتا كەتەيىك، شارا قىزىلوردا وبلىسى اكىمدىگىنىڭ قولداۋىمەن بايگە فەدەراتسياسى رەسپۋبليكالىق بىرلەستىگىنىڭ ۇيىمداستىرۋىمەن وتەدى.
سونداي-اق شاراعا Kusto group، Compass، Kazpetrol Group كومپانيالارى قولداۋ كورسەتەدى.
