شىعىس قازاقستان ديقانشىلارى سۋ تاپشىلىعىنىڭ زاردابىن تارتىپ وتىر

وسكەمەن. قازاقپارات - شىعىس قازاقستان وبلىسىنىڭ ديقانشىلارى سۋ تاپشىلىعىن سەزىنۋدە، دەپ حابارلايدى قازاقپارات ءتىلشىسى.

ش ق و اۋىل شارۋاشىلىعى باسقارماسىنىڭ مالىمەتىنە سۇيەنسەك، رەسپۋبليكاداعى سۋ ايدىندارىنىڭ 30 پايىزعا جۋىعى شىعىس قازاقستاندا شوعىرلانعان.

الايدا سوعان قاراماستان ءوڭىر ديقاندارى ەگىستىك جەرلەرىن سۋارۋ ءۇشىن سۋ تاپشىلىعىن سەزىنىپ وتىر.

«سوعان وراي الداعى ءۇش جىلدا گيدروتەحنيكالىق قۇرىلىستاردى رەتكە كەلتىرۋدى جانە ىلعالدى از جۇمسايتىن اگروتەحنولوگيالاردى ەنگىزۋدى كوزدەپ وتىرمىز. سۋ تاپشىلىعىنىڭ سەبەبى - ماگيسترالدىق جانە شارۋاشىلىق ارالىق كانالداردىڭ قاناعاتتانارلىقسىز جاعدايى، «قازسۋشار» مەكەمەسى وبلىستىق فيليالىنىڭ بالانسىندا تۇرعان ءتورت گيدروتەحنيكالىق قۇرىلىستى قايتا جاڭعىرتۋ جۇمىستارىنىڭ اياقتالماۋى» ، - دەيدى باسقارما باسشىسىنىڭ مىندەتىن اتقارۋشى راميل ساعاندىقوۆ.

جالپى وبلىس بويىنشا 84,8 مىڭ گەكتار سۋارمالى جەر بولسا، ءىس جۇزىندە ونىڭ 17 مىڭ گەكتارى عانا پايدالانىلۋدا.

وتكەن جىلى شامامەن التى مىڭ گەكتار القاپتا سۋ ۇنەمدەۋ تەحنولوگياسى قولدانىلدى.

ناقتى ايتقاندا، 5,4 مىڭ گەكتار جاڭبىرلاتىپ، 0,8 گەكتار تامشىلاتىپ سۋارىلدى.

شىعىس قازاقستاندا وسىنداي ادىستەرمەن جۇگەرى، كارتوپ، كوكونىس، سويا، كۇنباعىس سىندى داقىلدار وسىرىلەدى.