ەرلان قارين سىبايلاس جەمقورلىققا قارسى ءىس- قيمىل جونىندەگى كوميسسياسىنىڭ وتىرىسىن وتكىزدى

استانا. قازاقپارات – ق ر مەملەكەتتىك كەڭەسشىسى ەرلان ءقاريننىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى ءىس- قيمىل ماسەلەلەرى جونىندەگى كوميسسياسىنىڭ وتىرىسى ءوتتى، دەپ حابارلايدى قازاقپارات اقورداعا سىلتەمە جاساپ.

وتىرىستا 2021-2023 -جىلدارعا ارنالعان كولەڭكەلى ەكونوميكاعا قارسى ءىس- قيمىل جونىندەگى كەشەندى جوسپاردىڭ ورىندالۋ بارىسى قارالدى.

جيىندا قارجىلىق مونيتورينگ اگەنتتىگى، قارجى مينيسترلىگى، يندۋستريا جانە ينفراقۇرىلىمدىق دامۋ مينيسترلىگى باسشىلارىنىڭ كەشەندى جوسپاردى جۇزەگە اسىرۋعا قاتىستى ەسەبى تىڭدالدى.

ەرلان قارين حالىقتىڭ مۇقتاجدىعىن وتۋگە باعىتتالعان ناقتى نارىقتىق ەكونوميكاعا كوشۋ بارىسىندا كولەڭكەلى ەكونوميكانىڭ كولەمىن ازايتۋ ەرەكشە ماڭىزدى ەكەنىن ايتتى.

مەملەكەت باسشىسى مۇنداي مىندەتتى كەشە وتكەن ەلىمىزدىڭ الەۋمەتتىك- ەكونوميكالىق دامۋ ماسەلەلەرى جونىندەگى كەڭەيتىلگەن كەڭەستە قويعان بولاتىن.

مەملەكەتتىك كەڭەسشى جوسپارلانعان ءىس- شارالاردى ءوز دەڭگەيىندە اتقارۋدىڭ، كوزدەگەن ناتيجەگە قول جەتكىزۋدىڭ، جۇرگىزىلىپ جاتقان جۇمىستار كولەڭكەلى ەكونوميكانىڭ دەڭگەيىن تومەندەتۋگە شىنايى اسەر ەتۋىنىڭ، سونداي- اق، كولەڭكەلى ارەكەتتەرگە ۇرىنعان باسقا دا سالالاردى انىقتاۋدىڭ ماڭىزدى ەكەنىن اتاپ ءوتتى.

ايتالىق، يندۋستريا جانە ينفراقۇرىلىمدىق دامۋ مينيسترلىگى بويىنشا كەشەندى جوسپارعا كولىك جانە قۇرىلىس سالالارىن قامتىعان ءىس- شارالار عانا كىرگەن.

مىسالى، جەر قويناۋىن پايدالانۋ سالاسىندا دا كولەڭكەلى ەكونوميكامەن بايلانىستى تاۋەكەلدەر بار.

مينيسترلىككە جەتەكشىلىك ەتەتىن بارلىق سالا بويىنشا كولەڭكەلى ەكونوميكانىڭ سىن- قاتەرلەرىن جويۋ جونىندە تاپسىرما بەرىلدى.

سونىمەن قاتار، مەملەكەتتىك ورگاندار تاراپىنان قابىلداناتىن شارالار بيزنەسكە قىسىم كورسەتىپ، ينۆەستيتسيالىق كليماتتىڭ ناشارلاۋىنا اكەپ سوقپاۋى كەرەك.

جيىندا ايتىلعان وي- پىكىرلەردى سارالاي كەلە كوميسسيا تاراپىنان ناقتى ۇسىنىستار ازىرلەندى.

ال وتىرىس قورىتىندىسى بويىنشا مەملەكەتتىك كەڭەسشى ەرلان قارين ءبىرقاتار تاپسىرما بەردى، ونىڭ ورىندالۋى باقىلاۋعا الىندى.