استانادا باۋىرجان نوگەربەك مۇراسىنا ارنالعان حالىقارالىق فورۋم ءوتىپ جاتىر
فورۋم قازاق ۇلتتىق ونەر ۋنيۆەرسيتەتىنىڭ 25 جىلدىق مەرەيتويى اياسىندا ۇيىمداستىرىلدى. «باۋىرجان نوگەربەك مۇراسى: تەوريا، سىن جانە كينوپەداگوگيكا» اتتى شارا اياسىندا زيالى قاۋىم وكىلدەرى پروفەسسور باۋىرجان نوگەربەك مۇراسىنىڭ بۇگىنگى كينوۇردىس پەن كينوتانۋ سالاسىنداعى ماڭىزى، ونىڭ ۇرپاق تاربيەسى جولىنداعى ەرەن ەڭبەكتەرى تۋرالى ءسوز قوزعادى. وتاندىق جانە شەتەلدىك كينوتانۋشىلار مەن كينەماتوگرافيستەر ءوز پىكىرلەرىن ورتاعا سالدى.
«ءبىز 1976 -جىلدان باستاپ باۋىرجانمەن كينو سالاسىندا بىرگە جۇمىس ىستەدىك، وتباسىمىزبەن ارالاستىق. باۋكەڭ ازامات رەتىندە دە، مامان رەتىندە دە ەرەكشە تۇلعا ەدى. كينو تانۋ دەگەندى - ۇلتتانۋ دەپ ايتۋعا بولادى. باۋىرجان دا كينوداعى ۇلتتىق بولمىستىڭ كورىنۋىنە ەرەكشە نازار اۋداراتىن. قازاق كينوسىن تانىتۋدا ونىڭ ەڭبەگى زور. قازاق كينوسى تۋرالى ايتۋ دەگەنىمىز - قازاق تۋرالى ايتۋ دەگەن ءسوز، قازاقتىڭ تاعدىرى تۋرالى ايتۋ دەگەن ءسوز. باۋكەڭ ءارقاشان وسى ۇستانىمعا ەرەكشە بەرىك بولدى. ونىڭ مىقتىلىعىن ەكى نارسەدەن كورۋگە بولادى، ءبىرىنشى باۋكەڭنىڭ شاكىرتتەرى مىقتى ەدى. ونىڭ مەكتەبىن كورگەن جاستار بۇگىن ۇلكەن بيىكتەردى باعىندىرىپ ءجۇر. ەكىنشى ونىڭ اكەلىك قاسيەتى، تاربيەسى بالالارىن مىقتى تۇلعا ەتىپ قالىپتاستىردى» ، - دەيدى جازۋشى سماعۇل ەلۋباي.
باۋىرجان نوگەربەكتىڭ ارىپتەسى بولعان جازۋشىسى، دراماتۋرگ روزا مۇقانوۆا عالىمنىڭ ۇلت بولاشاعى جولىندا ۇلكەن ارمان ارقالاعانىن ايتادى.
«باۋىرجان نوگەربەك مەنىڭ ۇعىمىمدا رۋحانياتتىڭ ۇلكەن قايراتكەرى، كينو سالاسىنداعى ۇلكەن تۇلعا. ول كىسىنىڭ بويىندا ۇلكەندەردىڭ مەكتەبىن كورگەن، تاربيەسىن العان ەرەكشە قاسيەتى مەنمۇندالاپ تۇراتىن. وقۋ ورنىنا ۇستازدىق ەتۋگە ۇلكەن تۇلعالاردى تارتا ءبىلدى. ونىڭ ءوزى بولاشاقتاعى ۇلكەن مامانداردى تاربيەلەۋدەگى ارلى، اردا ماقساتى ەدى. ول كىسىنىڭ شاكىرتتەرمەن قارىم- قاتىناسىنىڭ ءوزى ەرەكشە بولاتىن. جاستارعا سەنىم ارتىپ، جاستاردىڭ پىكىرىن تىڭداي بىلەتىن. ءوزىنىڭ ارمانى كينوداعى ۇلتتىق كەلبەتتى كورسەتىۋ بولدى. باۋكەڭ كينوتانۋشى عالىم رەتىندە قازاق كينوسىنا ۇلكەن ۇلەس قوستى، زەرتتەۋلەرى كينوتانۋ عىلىمى ءۇشىن ۇلكەن ولجا سالدى» ، - دەدى روزا مۇقانوۆا.
سونداي- اق، فورۋم اياسىندا قازاق كينوسىنىڭ بەلگىلى شەبەرلەرى - كينورەجيسسەرلەر دارەجان ومىربايەۆ پەن بولات قالىمبەتوۆتىڭ فيلمدەرى كورسەتىلىپ، شەبەرلىك دارىستەرى وتەدى. سونىمەن بىرگە كينوتانۋشى، ونەرتانۋ دوكتورى گۇلنار ابىكەيەۆانىڭ شەبەرلىك ءدارىسى جوسپارلانۋدا.
اۆتور:
ريزابەك نۇسىپبەك ۇلى
