س ءى م ىستانبۇلدا وق ءتيىپ جارالانعان قازاق جىگىتىنە قاتىستى ءمان- جايدى ءتۇسىندىردى
«كەشە ءبىراز بۇقارالىق اقپارات قۇرالدارىندا ىستانبۇل قالاسىندا قازاق جىگىتىنە وق ءتيدى دەگەن اقپارات تارادى. سىرتقى ىستەر مينيسترلىگى بۇل ماسەلەگە قىسقاشا تۇسىنىكتەمە بەردى. الايدا، الەۋمەتتىك جەلىدە جاراقات العان جىگىتتىڭ جۇبايىنىڭ «وقتى دەنەدەن الۋ وتاسى اقىلى قىزمەت، سوندىقتان ءبىز باس تارتتىق، ويتكەنى اقشا باسقا ماقساتقا قاجەت» دەگەن ءسوزى تالقىعا ءتۇسىپ جاتىر ەكەن. وسى جەردە بۇل جانۇيانىڭ جاعدايىن تۇسىندىرە كەتەيىن. جاراقات العان جىگىتتىڭ اتى - بەگالى، جاسى 32 دە، ءوزىم باعانا تىكەلەي حابارلاسىپ سويلەستىم. ءبىراز اڭگىمە ايتتىق، كوشەدە بولعان اتىس تۋرالى سۇرادىم، سوندا ول ۇيالىپ ماعان ايتقانى مىناۋ بولدى: «مەنىڭ جاعدايىم جاقسى، وتانى جاساپ دارىگەرلەر وقتى دەنەمنەن الدى. بۇگىن- ەرتەڭ اۋرۋحانادان شىعامىن، بۇل جەردە جاتا بەرەتىن ۋاقىتىم جوق، ويتكەنى كىشكەنتاي قىزىمىزدى ەمدەۋگە الىپ كەلگەنبىز» . ىستانبۇلدا جاراقات العان جەرلەسىمىزدىڭ تەك قىزىن ويلاپ وتىرعانى بايقالدى، داۋىسى جانە كوڭىل- كۇيى كوتەرىڭكى ەكەن، ەكى ءسوزىنىڭ ءبىرى - قىزىم- قىزىم دەيدى. امان- ساۋ قالعانىنا قۋانىپ وتىر، سونداي جارقىن جومارت جىگىت ەكەن» ، - دەپ جازدى ايبەك سمادياروۆ Facebook پاراقشاسىندا.
ونىڭ ايتۋىنشا، ىستانبۇلداعى ديپلوماتتارىمىزدىڭ كومەگىمەن وتا تەگىن جاسالىپ، قولدان كەلگەن باسقا دا كومەك كورسەتىلىپ جاتىر.
«ەندى بەگالى باۋىرىمىزدىڭ ايىم اتتى كىشكەنتاي ءبۇلدىرشىنى تۋرالى ايتا كەتەيىن. تۇركيادا قاراشا ايىنان بەرى راك اۋرۋىن ەمدەپ حيميوتەراپيا ءوتىپ جاتىر، ارنايى وتا جاساۋ قاجەت. ءبىراق وزدەرىڭىز بىلەسىزدەر، راك اۋرۋىن ەمدەۋ ءۇشىن قوماقتاي قاراجات تالاپ ەتەدى. بەگالى قىزىنىڭ ەمىنە كىشىگىرىم سوما جيناپ قويىپتى، سونى وزىنە قيماي ايىمنىڭ وتاسىنا جۇمسايمىن دەدى. قانشا قاراجات قاجەت دەپ سۇرادىم، قىسىلىپ ايتپاي قويدى. «كومەك ءتۇسىپ جاتىر، جاقسى ادامدار بار، ۋايىمداماڭىز، مەن اياعىما تۇرسام ءبارىن ءوزىم شەشەمىن» دەپ ەر جىگىتتىڭ ءسوزىن ايتىپ وتىر. قىزىن سونداي قاتتى جاقسى كورەتىنى سوزىنەن دە، كوڭىلىنەن دە كورىنىپ تۇر، وق ءتيىپ جاراقات العان ادامعا مۇلدەم ۇقسامايدى. اكەنىڭ قىزىنا دەگەن ماحابباتى قانداي كەرەمەت، ءيا؟» ، - دەيدى ول.
بۇعان دەيىن ىستانبۇلدا اتىس بولىپ، قازاقستان ازاماتى جاراقات العانى حابارلاعان.
