پرەزيدەنت اباي وبلىسى باسشىلىعىنىڭ جۇمىسىنا جوعارى باعا بەردى
مەملەكەت باسشىسى ەلىمىزدىڭ مادەني-تاريحي ورتالىعى - سەمەي قالاسىنىڭ ينفراقۇرىلىمى ونىڭ مارتەبەسىنە ساي بولۋى كەرەكتىگىن تىلگە تيەك ەتتى. اباي وبلىسىنىڭ اكىمى قازاقستان پرەزيدەنتىنە بەرگەن ەسەبىندە قالانىڭ دامۋىنا دا جەكە توقتالدى.
استانادا الەۋمەتتىك-ەكونوميكالىق دامۋ ماسەلەلەرىنە ارنالعان كەڭەستە مەملەكەت باسشىسى اباي وبلىسىنىڭ اكىمى نۇرلان ۇرانحايەۆتىڭ ەسەبىن تىڭدادى. قاسىم-جومارت توقايەۆ ءوڭىردىڭ اكىمشىلىك ورتالىعى ەرەكشە ماڭىزعا يە ەكەنىن اتاپ ءوتتى.
«سەمەي قالاسى ەلىمىزدەگى ادەمى ءارى تاريحي ورتالىقتاردىڭ ءبىرى بولىپ سانالادى. شاھاردىڭ كەلبەتى لايىقتى كورىنۋى ءۇشىن ونى اباتتاندىرۋعا ەرەكشە نازار اۋدارۋ قاجەت. ارينە، ينفراقۇرىلىمدى دا جاڭارتۋ كەرەك، سوندىقتان جۇمىس كوپ»، - دەدى مەملەكەت باسشىسى.
نۇرلان ۇرانحايەۆ ءوز بايانداماسىندا سەمەي قالاسى بيۋدجەتىنىڭ ايتارلىقتاي ۇلعايعانىن جانە قالانىڭ ەڭ وزەكتى جانە قوردالانعان ماسەلەلەرىن شەشۋ جولدارىن اتاپ ءوتتى.
«سەمەي قالاسىنىڭ تاريحي-مادەني جانە جاڭا اكىمشىلىك ورتالىق مارتەبەسىن، سونداي-اق ءوڭىر حالقىنىڭ 60 پايىزعا جۋىعى قالادا تۇراتىنىن ەسكەرە وتىرىپ، وبلىس ورتالىعىنىڭ دامۋى ەرەكشە باقىلاۋدا. وسىلايشا، بيىل سەمەي قالاسىنىڭ بيۋدجەتى 85 ميلليارد تەڭگەدەن استى، بۇل وتكەن جىلمەن سالىستىرعاندا شامامەن 50 پايىزعا كوپ»، - دەدى ءوڭىر باسشىسى.
تۇرعىن ءۇي-كوممۋنالدىق شارۋاشىلىق سالاسىن قارجىلاندىرۋ كولەمى 1,4 ەسە، حالىقتى الەۋمەتتىك قورعاۋ 1,5 ەسە ۇلعايتىلدى.
2023-2024 -جىلدارى سەمەي قالاسىن جىلۋمەن قامتۋ ماسەلەلەرىن شەشۋ ءۇشىن ءوڭىردى دامىتۋدىڭ كەشەندى جوسپارىنا جىلۋ كوزدەرىن قايتا جاڭعىرتۋ جانە جەلىلەردى جاڭعىرتۋ بويىنشا 150 ميلليارد تەڭگەدەن استام سوماعا 30 جوبا ەنگىزىلگەن.
بايانداما سوڭىندا مەملەكەت باسشىسى اتقارىلعان جۇمىستاردىڭ ناتيجەسىن جوعارى باعالاپ، ونى بارلىق سالالاردا جالعاستىرۋدى تاپسىردى.
«قىسقا مەرزىمدە كوپ جۇمىس ىستەلدى. مۇنى مويىنداۋ كەرەك. ءبىراق الدا ءالى دە جۇمىس كوپ. شەشىلمەگەن ماسەلەلەر بار. سوندىقتان بۇل جۇمىستى كەشەندى تۇردە جۇرگىزۋ كەرەك»، - دەدى قاسىم-جومارت توقايەۆ.
