جاڭاوزەندەگى جارىلىس: گاز قۇبىرىنداعى اقاۋ كورسەتىلگەن بەينەجازباعا ت ج د تۇسىنىك بەردى

اقتاۋ. قازاقپارات - الەۋمەتتىك جەلىدە جاڭاوزەندەگى جارىلىس بولعان ورىننان گازدىڭ شىققانىن ايعاقتايتىن بەينەجازبا تارادى.

ماڭعىستاۋ وبلىستىق توتەنشە جاعدايلار دەپارتامەنتى بەينەجازباعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

19-ساۋىردە الەۋمەتتىك جەلىلەردە 17-ءساۋىر كۇنى جارىلىس بولعان جاڭاوزەندەگى تۇرعىن ءۇي اۋماعىنداعى جەراستى گاز قۇبىرىن ماماندار جانە ەكسپەرتتەردىڭ قاراۋى كەزىندە تۇسىرىلگەن گازدىڭ شىعۋىن ايعاقتايتىن بەينەجازبا تاراعان. ماڭعىستاۋ وبلىستىق توتەنشە جاعدايلار دەپارتامەنتى بۇل ۆيدەونىڭ جارىلىستىڭ دالەلى بولىپ تانىلمايتىنىن مالىمدەدى.

«نازارلارىڭىزعا سالامىز، كورسەتىلگەن بەينەروليكتەر جارىلىستىڭ دالەلى بولىپ تانىلمايدى. قازىرگى تاڭدا جۇرگىزىلىپ جاتقان جارىلىس-تەحنيكالىق ساراپتاما بىرنەشە كەزەڭنەن تۇرادى، كورۋ ارقىلى باقىلاۋ، تەرەڭىرەك جانە ەگجەي-تەگجەيلى زەرتتەۋ ءۇشىن جاعدايدى باعالاۋ قاجەت. سونىمەن قاتار قانداي دا ءبىر جالعان اقپاراتتاردى جاريا ەتەتىن بولسا، ق ر قىلمىستىق كودەكسىنىڭ 274-بابى بويىنشا قىلمىستىق جاۋاپكەرشىلىككە تارتىلاتىندىعىن ەسكەرتەدى» دەلىنگەن باسپا ءسوز مالىمەتىندە.

سونداي-اق ماڭعىستاۋ وبلىستىق توتەنشە جاعدايلار دەپارتامەنتى ازاماتتاردان تەك رەسمي اقپارات كوزدەرىنە سەنۋىن سۇراعان.

ايتا كەتسەك، 17-ساۋىردە جاڭاوزەن قالاسىنىڭ 2-مولتەك اۋدانىنداعى 2 قاباتتى ۇيدە جارىلىس بولىپ، 13 ادام زارداپ شەككەن ەدى.