قازاقستان شەكاراسىنىڭ قانشا پايىزى تەحنيكالىق كۇزەت جابدىقتارىمەن جاراقتالعان
ۇلتتىق قاۋىپسىزدىك كوميتەتى ءتوراعاسىنىڭ ورىنباسارى - شەكارا قىزمەتىنىڭ ديرەكتورى ەرلان الداجۇمانوۆ سەنات كۋلۋارىندا وسىنداي مالىمەت ايتتى، دەپ حابارلايدى قازاقپارات ءتىلشىسى.
«ءبىز تاۋەلسىزدىك العان كەزدە كەڭەس وداعىنان قالعان، شىعىس شەكارا وكرۋگىندەگى 6 شەكارا جاساعى قىتايمەن شەكارانىڭ 1700 شاقىرىمىن كۇزەتىپ تۇردى. بىزگە وسى 1700 شاقىرىم شەكارانى كۇزەتىپ تۇرعان 6 جاساقپەن قازاقستان رەسپۋبليكاسىنىڭ بۇكىل پەريمەترىن جابۋ تۋرالى پارمەن تۇسكەن ەدى. ءبىز بۇكىل شەكارانى بەلگىلەپ، باقىلاۋ جۇرگىزۋ ءۇشىن وسى قۇراممەن شىعۋعا ءماجبۇر بولدىق. ياعني، كۇزەتىلەتىن شەكارا ۇزىندىعى 9 ەسە ۇلعايدى. قازىر شەكارامىزدىڭ ۇزىندىعى 15 132 شاقىرىم ەكەنىن بىلەسىزدەر. كەي تۇستاردا دەماركاتسيا ءالى ءجۇرىپ جاتقاندىقتان ازداعان وزگەرىس بولۋى مۇمكىن. ءبىز باسىندا ەشبىر جابدىقتالماعان ورىندارعا كەلدىك. ول كەزدە اكىمدىكتەر بولگەن عيماراتتاردا وتىردىق. ياعني ءتۇرلى سيپاتتاعى قولدانىسقا بەيىمدەلگەن عيماراتتار ەدى. كەيىن بىرتىندەپ ينفراقۇرىلىمدى جەتىلدىرۋ، شتات سانىن كوبەيتۋ جۇمىستارى باستالدى»، - دەدى ول.
ۇ ق ك وكىلى نورماتيۆ بويىنشا شەكارانى كۇزەتەتىن شتات سانى قازىرگىدەن بىرنەشە ەسە ۇلكەن بولۋى كەرەك ەكەنىن ايتادى.
«وسى شتات سانىن اداممەن جاپپاۋ ءۇشىن تەحنيكالىق جاراقتاندىرۋدى جەتىلدىرۋىمىز كەرەك. سەنات وتىرىسىندا دەپۋتتاردىڭ سۇراعىنا جاۋاپ بەرگەن كەزدە ايتتىم. قازىرگى تاڭدا قازاقستان رەسپۋبليكاسى شەكاراسىنىڭ 16 پايىزى عانا شەكارانى كۇزەتەتىن تەحنيكالىق جابدىقتارمەن جاراقتالعان. بۇل وتە از ەكەنىن تۇسىنەتىن شىعارسىزدار. نەگىزىنەن بۇل قىتاي باعىتى. قالعان شەكارامىزدى تەك ادامدار كۇزەتىپ تۇر. بۇل پروبلەمانى ءبارى بىلەدى. اقشا بىرتىندەپ ءبولىنىپ جاتىر. ويتكەنى قاجەتتىلىك وتە ۇلكەن. ونىڭ سوماسىن ايتقىم دا كەلىپ تۇرعان جوق»، - دەدى شەكارا قىزمەتىنىڭ ديرەكتورى.
سونداي-اق، ەرلان الداجۇمانوۆ مەملەكەتتىك شەكارانىڭ ءار شاقىرىمىن ارنايى ينفراقۇرىلىممەن جابدىقتاۋ ءۇشىن قانشا قاراجات كەرەك ەكەنىن ايتتى.
«ەكونوميكالىق احۋالدى بىلەمىز، سوندىقتان ءبولىنىپ جاتقان اقشانى قاناعات تۇتامىز. ەڭ باستىسى سول اقشانى تارتىپپەن يگەرۋ كەرەك. سىزدەر ءتۇسىنۋ ءۇشىن مىسال كەلتىرەيىن. ءبىر شەكارا زاستاۆاسى ستاندارت بويىنشا 20 شاقىرىم شەكارانى كۇزەتەدى. وسىنداي ۇزىندىقتاعى مەملەكەتتىك شەكارانى قاجەتتى تەنيكالىق قۇرالدارمەن، ينفراقۇرىلىممەن جابدىقتاۋ ءۇشىن 2,9 ميلليارد تەڭگە كەرەك. بۇل وتە كوپ اقشا. 20 شاقىرىمعا وسىنشا كەرەك بولسا، بىزدە جالپى شەكارانىڭ ۇزىندىعى 15132 شاقىرىم»، - دەدى ول.
