ءۇندىستان بيىل قىتايدى باسىپ وزادى
سوڭعى 70 جىلدا قىتاي مەن ءۇندىستان حالقى الەمدەگى جان سانىنىڭ ۇشتەن بىرىنەن استامىن قۇرادى.
ۇيىمنىڭ بولجامىنشا، ءۇندىستان حالقى جاقىن ارادا 1,4286 ميلليارد ادامعا جەتۋى كەرەك، بۇل 1,4257 ميلليارد حالقى بار قىتايدان 2,9 ميلليونعا كوپ.
ب ۇ ۇ سەيسەنبىدە الەمدەگى دەموگرافيالىق بەتالىستاردىڭ وزگەرۋىنە كوزقاراس تۋرالى باياندامانى جاريالادى.
قىتايدا تۋۋ كورسەتكىشى تومەندەپ، بىلتىر حالىق سانى 1961 -جىلدان بەرى العاش رەت ازايا باستادى. دەموگرافتار مۇنى ەلدە 35 جىل بويى ءجۇرىپ، جەتى جىل بۇرىن توقتاپ قالعان ءبىر بالا ساياساتىمەن، بالا باعۋعا جۇمسالاتىن شىعىننىڭ جوعارى بولۋىمەن بايلانىستىرىپ وتىر.
ءۇندىستاندا ءبىر ايەلگە شاققانداعى تۋۋدىڭ ورتاشا سانى دا جىلدان جىلعا ازايىپ كەلەدى.
بۇل رەتتە باياندامادا ءۇندىستان حالقىنىڭ سانى تۋرالى مالىمەتتەر بولجامدى بولىپ تابىلادى، ويتكەنى ەلدە سوڭعى حالىق ساناعى 2011 -جىلى جۇرگىزىلگەن.
سوڭعى 140 جىل ىشىندە ءۇندىستان حالقىنىڭ سانى ءار 10 جىل سايىن جۇيەلى تۇردە ەسەپتەلىپ كەلدى، ءبىراق 2021 -جىلى كوروناۆيرۋس پاندەمياسىنا بايلانىستى حالىق ساناعى توقتاتىلدى. ەندى ول 2024 -جىلعا جوسپارلانعان.
قاراشا ايىندا الەم حالقىنىڭ سانى 8 ميلليارد ادامعا جەتتى. دەگەنمەن، ساراپشىلار ونىڭ ءوسۋ قارقىنى باسەڭدەپ، قازىر 1950 -جىلدان بەرگى ەڭ تومەنگى دەڭگەيگە جەتكەنىن ايتادى.
ءۇندىستاندا دا، قىتايدا دا تۋۋ كورسەتكىشى تومەندەۋدە.
قىتايدا 2016 -جىلى بيلىك ءبىر بالا ساياساتىن جويىپ، جاس وتباسىلاردى ەكى نەمەسە ودان دا كوپ بالالى بولۋعا كوندىرۋگە باعىتتالعان بىرنەشە باستامالاردى ۇسىنعانىمەن، حالىق سانى ازايىپ كەلەدى.
ءۇندىستاندا دا تۋۋ كورسەتكىشى سوڭعى ون جىلدىقتاردا ايتارلىقتاي تومەندەدى. بۇل رەتتە حالىقتىڭ ءوسىمى جىلىنا %1,2 دەڭگەيىندە قالىپ وتىر، بۇل وتكەن ونجىلدىقپەن سالىستىرعاندا شامامەن تورتتەن بىرىنە تومەن.
ب ۇ ۇ حالىقتى ورنالاستىرۋ قورىنىڭ تاپسىرىسى بويىنشا جۇرگىزىلگەن زەرتتەۋ ءۇندىستانداعى حالىق سانىنىڭ ءوسىمى ۇرەي تۋدىراتىنىن كورسەتتى. ۇندىلەردىڭ كوپشىلىگى حالىقتى تىم كوپ جانە تۋۋ كورسەتكىشىن تىم جوعارى دەپ اتادى.
ساۋالناماعا قاتىسقانداردىڭ ۇشتەن ەكىسىنە جۋىعى حالىق سانىنىڭ ءوسۋى ەلدە ەكونوميكالىق قيىنشىلىقتار تۋعىزىپ وتىرعانىن ايتتى.
ءبىراق ب ۇ ۇ وكىلدەرى ۇندىستەر حالىق سانىنىڭ وسۋىنە الاڭداماۋى كەرەك دەپ سانايدى. «حالىق سانى ۇرەي تۋدىرماۋى كەرەك. كەرىسىنشە، ادامداردىڭ جەكە تاڭداۋ قۇقىعى ساقتالسا، بۇل ساندار پروگرەستىڭ، دامۋدىڭ جانە امبيتسيانىڭ ءوسۋىنىڭ سيمۆولى رەتىندە قاراستىرىلۋى كەرەك»، - دەدى ب ۇ ۇ-نىڭ ءۇندىستانداعى وكىلى اندرەا ۆوينار.
