وڭتۇستىك كورەياعا جۇمىس ىستەۋگە باراتىن قازاقستاندىقتاردى الدىن الا دايىندايدى

استانا. قازاقپارات - وڭتۇستىك كورەياعا ەڭبەك ەتۋ جانە بىلىكتىلىگىن ارتتىرۋعا باراتىن وتانداستارىمىزعا اتالعان ەلدىڭ زاڭدىلىقتارى مەن ءتارتىبى ۇيرەتىلەدى.

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ءمالىم ەتتى، دەپ حابارلايدى قازاقپارات ءتىلشىسى.

«وڭتۇستىك كورەياعا ەڭبەك ەتۋگە باراتىن قازاقستاندىقتاردى الدىن الا دايىندايمىز. بىرىنشىدەن ءتىل ماسەلەسى. ودان ءارى ول ەلدىڭ زاڭدىلىقتارى مەن ءتارتىبى جانە ءوزىن-ءوزى ۇستاۋ، ءجۇرۋ-تۇرۋ جاعىن ۇيرەتەمىز. وسىلايشا وتانداستارىمىز وڭتۇستىك كورەيادا ەڭبەك ەتىپ نەمەسە بىلىكتىلىگىن كوتەرە الادى. جۋىردا ۇكىمەت باسشىسىنىڭ ءبىرىنشى ورىنباسارى ر. سكليار باستاعان دەلەگاتسيا كورەيالىق كومپانيالار مەن زاۋىتتاردى ەلىمىزدە اشۋ ماسەلەسىن تالقىلاپ، شەشىم قابىلداندى»، - دەدى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

بۇعان دەيىن حابارلاعانىمىزداي، قازاقستاندىقتاردىڭ وڭتۇستىك كورەيادا ەڭبەك ەتىپ، قىزمەت اتقارۋى ماسەلەسىن ەكىجاقتى كەلىسىم ارقىلى زاڭداستىرۋ قارالىپ جاتىر.

ەسكە سالايىق، وتكەن جىلعى 1-ساۋىردەن باستاپ قازاقستاندىقتار وڭتۇستىك كورەياعا ۆيزاسىز بارا الادى.