بۇگىن الماتىدا جالپىقالالىق سەيسميكالىق وقۋ-جاتتىعۋ وتەدى
الماتى قالالىق توتەنشە جاعدايلار دەپارتامەنتىنىڭ مالىمەتىنشە، وسى بەيسەنبى ساعات 11:00-دە جىلىنا ءبىر مارتە ۇيىمداستىرىلاتىن جالپىقالالىق سەيسميكالىق وقۋ-جاتتىعۋ وتەدى.
ال، قالا ۇيىمدارىندا سەيسميكالىق جاتتىعۋلار توقسان سايىن وتكىزىلەدى. ءبىرىنشى توقساندا 2,8 مىڭنان استامى ورىندالدى.
«سەيسميكالىق وقۋ-جاتتىعۋ كۇنى تەلە جانە راديوارنالار سيرەنالىق قوندىرعىلاردى ىسكە قوسۋ ارقىلى قالالىق ەسكەرتۋ جۇيەسى ىسكە قوسىلادى، «دارمەن» موبيلدى قوسىمشاسى ارقىلى push-حابارلاما جىبەرىلەدى»، - دەپ حابارلادى ۆەدومستۆودان.
سونىمەن قاتار، جەر سىلكىنىسى كەزىندە حالىقتىڭ ءىس-ارەكەتى بويىنشا جادىنامالار تاراتا وتىرىپ، سونداي-اق توتەنشە جاعدايىنا دابىل دورباسى جاساقتاۋ بويىنشا وقىتۋ ترەنينگى وتكىزىلەدى.
سەيسميكالىق وقۋ-جاتتىعۋدىڭ نەگىزگى ماقساتى - تۇرعىنداردى ەۆاكۋاتسيالاۋ جولىن، قاۋىپسىز جەرلەردى الدىن الا انىقتاپ، اپات كەزىندە قاجەت چەمودانداردى دايىنداۋى ءۇشىن قالا تۇرعىندارىنىڭ توتەنشە جاعدايلار كەزىندەگى ءىس-قيمىلدارعا دايىندىق دەڭگەيىن ارتتىرۋ.
قالادا شارتتى تۇردە باسپاناسىز قالعان ادامدارعى 384 قابىلداۋ پۋنكتى ءىس جۇزىندە ورنالاستىرىلادى.
بارلىق ءبىلىم بەرۋ، دەنساۋلىق ساقتاۋ نىساندارى مەن ادامدار كوپ جۇرەتىن ساۋدا ورتالىعىندا ەۆاكۋاتسيالاۋ ءۇشىن وقۋ ەلەمەنتتەرى ازىرلەنەدى، وندا تجد قىزمەتكەرلەرى ادىستەمەلىك كومەك كورسەتىپ، جەر سىلكىنىسى كەزىندەگى «10 قاراپايىم قادام» جادىناماسىن تاراتادى.
قاۋىپسىز ورىندار - ەلەكتر جەلىلەرى مەن عيماراتتاردان الىس ورنالاسقان اشىق جەرلەر.
الماتى 9-10 بالدىق سەيسميكالىق ايماقتا ورنالاسقان. جىل سايىن قالادا 200 گە دەيىن ءالسىز، سەزىلمەيتىن جەر سىلكىنىسى بولادى.
بۇل رەتتە كۇشى 2 دەن 4 بالعا دەيىنگى جەر سىلكىنىسى - الماتى ءۇشىن فوندىق رەجيم.
سەيسمولوگيا ينستيتۋتىنىڭ بولجام كوميسسياسىنىڭ مالىمەتىنشە، جىل سوڭىنا دەيىن قالادا 7 جانە ودان دا كوپ بالدىق جەر سىلكىنىسى بولمايدى.
سوندىقتان جۇرگىزىلىپ جاتقان قالالىق سەيسميكالىق دايىندىق جەر سىلكىنىسى بولادى دەگەن بولجامعا ەش قاتىسى جوق.
دەپارتامەنت وكىلدەرى مەگاپوليس تۇرعىندارى مەن قوناقتارىنا تۇسىنىستىكپەن قاراپ، سابىر ساقتاۋدى سۇرادى.
