ەلىمىزدە بوسقىنداردىڭ مارتەبەسى وسەدى
ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ مالىمدەۋىنشە، ولاردىڭ مارتەبەسى ارتا تۇسپەك، دەپ حابارلايدى قازاقپارات ءتىلشىسى.
«الەمدەگى گەوساياسي جاعدايعا بايلانىستى بۇگىندە بوسقىندار ماسەلەسى وزەكتى. اتالعان ماسەلە بىلتىر ىشكى ىستەر مينيسترلىگىنەن ءبىزدىڭ قۇزىرەتىمىزگە بەرىلدى. قازاقستان 1998-جىلى بوسقىندار مارتەبەسى تۋرالى دۇنيەجۇزىلىك كونۆەنتسياسىن راتيفيكاتسيالادى. وعان سايكەس ەلگە كەلگەن بوسقىندارعا جاعداي جاساپ، الەۋمەتتىك قولداۋ جاعى قاراستىرىلعان. وسى ورايدا ەلىمىزدىڭ مۇمكىندىگىنە قاراي بوسقىندار ماسەلەسىن كوتەرىپ، قاجەت بولعان جاعدايدا زاڭنامالىق جانە قۇقىقتىق اكتىلەردى قابىلداپ، بوسقىندار مارتەبەسىن بەلگىلى ءبىر دەڭگەيگە كوتەرۋدى جولعا قويدىق»، - دەدى ءىلياس يسپانوۆ و ك ق- دە وتكەن بريفينگىدە.
ونىڭ ايتۋىنشا، بۇگىندە اتالعان باعىتتا مەملەكەتتىك قۇزىرلى ورگاندارمەن بىرلەسكەن جۇمىس ءجۇرىپ جاتىر.
بۇعان دەيىن حابارلاعانىمىزداي، قازاقستانعا ينۆەستيتسيا قۇيعان شەتەل ازاماتتارىنا يمميگرانت ۆيزاسىمەن قاتار 10 جىل تۇرۋعا رۇقسات بەرىلمەك.
ايتا كەتەيىك، بۇگىندە ەلىمىزدە 14417 شەتەل ازاماتى جۇمىس ىستەپ جاتىر.
ونىڭ ىشىندە 3790 سىرتتان كەلگەن ەڭبەك ميگرانتىنا رۇقسات بيىل بەرىلگەن.
