وڭتۇستىك كورەيادا زاڭسىز جۇمىس ىستەيتىن قازاقستاندىقتاردىڭ ماسەلەسى شەشىلۋى مۇمكىن

استانا. قازاقپارات - قازاقستاندىقتاردىڭ وڭتۇستىك كورەيادا ەڭبەك ەتىپ، قىزمەت اتقارۋى ماسەلەسى ەكىجاقتى كەلىسىم ارقىلى زاڭداستىرىلماق.

بۇل تۋرالى ورتالىق كوممۋنكاتسيالار قىزمەتىندە وتكەن بريفينگ بارىسىندا بەلگىلى بولدى، دەپ حابارلايدى قازاقپارات ءتىلشىسى.

«قازاقستان ازاماتتارىنىڭ شەتەلدە ەڭبەك ەتىپ، قىزمەت ەتىپ، بىلىكتىلىگىن كوتەرۋىن رەتتەۋ - ماڭىزدى باعىتتاردىڭ ءبىرى. اتالعان ماسەلە پرەزيدەنتتىڭ 2021-جىلعى حالىققا جولداۋىندا ايقىندالعان. بۇل - جاھاندىق ترەند. قازاقستاندىقتاردىڭ شەتەلدە ەڭبەك ەتۋىنە شەكتەۋ قويا المايمىز، ونىڭ قاجەتى دە جوق. كەرىسىنشە، وتانداستارىمىزدىڭ شەتەل اسىپ ەڭبەك ەتۋىنە، ءوز سالاسى بويىنشا بىلىكتىلىگىن ارتتىرىپ، جەتىستىكتەرگە جەتۋىنە قولداۋ كورسەتەمىز. ياعني ازاماتتاردىڭ شەتەلدەگى ەڭبەك قۇقىقتارىن قورعايتىن بولامىز. وسى ورايدا بۇگىندە تۇركيا، ب ا ءا، ا ق ش، ۇلى بريتانيا، سولتۇستىك يرلانديا، وڭتۇستىك كورەيا، يزرايل، قاتار، گەرمانياعا سىرتقى ىستەر مينيسترلىگى ارقىلى كەلىسىمشارت جوباسى جولداندى. وعان قول قويىلعاننان كەيىن اتالعان ەلدەردە ەڭبەك ەتىپ جاتقان قازاقستاندىقتاردىڭ قۇقىعىن قورعايتىن زاڭدى قۇجات بولادى»، - دەدى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ.

سونداي-اق، كوشى-قون كوميتەتىنىڭ باسشىسى وڭتۇستىك كورەيا ەلىندەگى قازاقستاندىق جۇمىس كۇشىنە قاتىستى مالىمدەمە جاسادى.

«كورەيا ەلىنەن جىل سايىن قازاقستاندىقتارعا قاتىستى ءارتۇرلى جاعىمسىز مالىمەتتەر كەلىپ جاتادى. ول ەل ەڭبەك ميگراتسياسى ماسەلەسىن شەت مەملەكەتتەرمەن ەكىجاقتى كەلىسىم ارقىلى عانا جۇزەگە اسىرادى. وسى ماسەلەنى رەتتەۋدى قولعا الىپ جاتىرمىز. 25-26- ءساۋىردە جۇمىس توبى سەۋلگە بارىپ ەڭبەك ميگراتسياسى ماسەلەسىن تالقىلايدى. قازىر وڭتۇستىك كورەيادا 16 ەلگە ەڭبەك كۆوتاسى بەرىلەدى، كەلەسى بوپ ءبىزدىڭ ەل قاراستىرىلىپ جاتىر»، - دەيدى ول.