قانداس مارتەبەسىنە قۇجاتتار شەتەلدەگى ەلشىلىكتەردە قابىلدانادى - مينيسترلىك

استانا. قازاقپارات - ەندىگى ۋاقىتتا ەلگە ورالعىسى كەلگەن وتانداستارىمىز، قانداس مارتەبەسىن الۋ ءۇشىن ءوتىنىشتى سول ەلدەگى قازاقستاننىڭ ەلشىلىگى ارقىلى بەرە الادى.

ياعني، ەلگە كەلۋدىڭ قاجەتى بولمايدى. جاڭا جوبا تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ مىندەتىن اتقارۋشى ءىلياس يسپانوۆ ءمالىم ەتتى، دەپ حابارلايدى قازاقپارات ءتىلشىسى.

«قانداستاردى ەلگە قايتارۋدىڭ جاڭا جولىن قولعا الدىق. بۇل دەگەنىمىز شەتەلدەگى وتانداستار ەلگە ورالۋ ءۇشىن قۇجاتتاردى سول مەملەكەتتەگى قازاقستاننىڭ ەلشىلىگىنە تاپسىرادى. ماقسات - قانداستار ۆيزا بار جانە ۆيزا جوق ەلدەردەن كەلىپ جاتادى. ولار قازاقستانعا كەلگەننەن كەيىن قۇجاتتاردى تاپسىرعاندا كوپتەگەن قيىندىقتار مەن كەدەرگىلەر تۋىنداپ جاتادى. قۇجاتتارى دۇرىس بولماۋى مۇمكىن. ونىڭ ۇستىنە قانداس مارتەبەسىن بەرۋ ءبىر كۇندىك جۇمىس ەمەس، ۇزاق پروتسەسس»، - دەدى ءىلياس يسپانوۆ و ك ق- دە وتكەن بريفينگىدە.

ايتۋىنشا، شەتەلدەگى ەلشىلىكتەردەن كەلگەن قانداستاردىڭ ءوتىنىشى كوشى-قون كوميتەتى مەن جەرگىلىكتى اتقارۋشى ورگاندارعا تىكەلەي تۇسەدى.

«ءوتىنىش نەگىزىندە مەملەكەتتىك قۇزىرلى ورگاندار جانە جەرگىلىكتى اتقارۋشى بيلىك بىرلەسە وتىرىپ كەلەتىن قانداستاردى ورنالاستىرۋ، قولداۋ كورسەتۋ جاعىن الدىن الا قاراستىرادى. ءبارى دۇرىس بولعان جاعدايدا قانداس باۋىرلارىمىز وتانعا كەلىپ تىرشىلىك جالعاستىرا الادى»، - دەيدى كوميتەت باسشىسى.

ەڭبەك مينيسترلىگىنىڭ وكىلى، اتالعان جاڭاشىلدىق ازىرگە پيلوتتىق جوبا رەتىندە ىسكە اسىپ جاتقانىن ايتتى. سپيكەردىڭ دەرەگىنشە، بۇگىندە تۇرىكمەنستاننان 505 قانداس (156 وتباسى) قۇجاتتارىن ەلشىلىككە تاپسىردى.