ارىستانبەك مۇحامەدي ۇلىنىڭ ورىنباسارىن سوت زالىنان جەدەل جاردەم الىپ كەتتى

استانا. قازاقپارات - ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى مەن ونىڭ سىبايلاستارىنىڭ ۇستىنەن قوزعالعان قىلمىستىق ءىستىڭ سوت وتىرىسى كەلەسى اپتاعا اۋىستىرىلدى، دەپ حابارلايدى قازاقپارات ءتىلشىسى.

ەسكە سالايىق، 17-ساۋىردە ۇلتتىق مۋزەيدىڭ بۇرىنعى ديرەكتورى ارىستانبەك مۇحامەدي ۇلى مەن ونىڭ سىبايلاستارىنىڭ (الماز نۇرازحان، ازامات كوشەنوۆ، ايىم ءسادۋاقاسوۆا) ءىسى بويىنشا سوت وتىرىسى باستالدى.

قىلمىستىق ءىس ەلوردانىڭ №2 بايقوڭىر اۋداندىق سوتىندا قارالىپ جاتىر.

بۇگىنگى سوت وتىرىسى بارىسىندا ايىپتالۋشىلاردىڭ ءبىرى الماز نۇرازحان ءوزىن جايسىز سەزىنىپ، كومەك كەرەگىن ءمالىم ەتتى.

وسىلايشا سوتتالۋشىنى وتىرىس زالىنان جەدەل جاردەم الىپ كەتتى.

سۋديا ءوز كەزەگىندە سوت وتىرىسىن 24-ءساۋىر ساعات 10:00 گە اۋىستىردى.

«ا. نۇرازحاندى جەدەل جاردەم بريگاداسى كلينيكاعا الىپ كەتتى، قايسى كلينيكا ەكەنىن بىلمەدىم. دياگنوز قويۋ ءۇشىن بەلگىلى ءبىر سالا ماماندارىنىڭ كومەگى قاجەت»، - دەدى ايىپتالۋشىنىڭ ادۆوكاتى مۇستاحيم تولەيەۆ.

بۇعان دەيىن ارىستانبەك مۇحامەدي ۇلى مەن سىبايلاستارىنا قانداي ايىپ تاعىلعانى بەلگىلى بولدى.

ءوز كەزەگىندە ايىپتالۋشى ارىستانبەك مۇحامەدي ۇلى كىناسىن مويىندامادى.

سونداي- اق، سوت ارىستانبەك مۇحامەدي ۇلىن ءۇيقاماققا اۋىستىرۋدان باس تارتقان ەدى.

ەسكە سالايىق، بىلتىر 28-مامىردا سوت سانكتسياسىمەن سول كەزدەگى ۇلتتىق مۋزەي ديرەكتورى ارىستانبەك مۇحامەدي ۇلى قاماۋعا الىنعان بولاتىن.