ساراپشى حالىقتى ورتاشا تابىس تۇزاعىنان قالاي قۇتقارۋعا بولاتىنىن ايتتى

استانا. قازاقپارات - تاۋەلسىز قارجى ساراپشىسى اندرەي چەبوتاريەۆ پرەزيدەنت قاسىم-جومارت توقايەۆتىڭ ۇكىمەتتىڭ كەڭەيتىلگەن كەڭەسىندە قوزعاعان ەكونوميكالىق باستامالارىنا پىكىر ءبىلدىردى، دەپ حابارلايدى قازاقپارات ءتىلشىسى.

«پرەزيدەنت ايتقان «ورتاشا تابىس تۇزاعى» دەگەن نە؟ ناقتى ءبىر ادامدى مىسالعا كەلتىرىپ ايتساق، تابىسىڭ كەدەيلىكتەن ءسال جوعارى، ءبىراق ودان ارى وسۋگە جول جوق دەگەن ءسوز. بىلاي قاراساق، جامان ءومىر ءسۇرىپ جاتقان جوقپىز. ءبارى بار سياقتى. ءبىراق وسى «ورتاشا تابىس تۇزاعىنان» قۇتىلا الماي وتىرمىز. بۇل تۇزاقتان قۇتىلۋعا ەكونوميكالىق ءوسىم عانا جەتكىلىكسىز. ەكونوميكانىڭ ءوسىمىن مۇنايدىڭ ەسەبىنەن قامتاماسىز ەتۋگە بولادى. مىسالى، ەرتەڭ قانداي دا ءبىر وقيعانىڭ سالدارىنان مۇناي باعاسى باررەلىنە 140 دوللار بولىپ قىمباتتاپ شىعا كەلسە، بىزدەگى ەكونوميكا وپ-وڭاي %6، %7 ءوسىم كورسەتەدى. ءبىراق ول ادامداردىڭ ءومىرىن وزگەرتپەيدى. «ورتاشا تابىس تۇزاعىنان» قۇتىلۋ ءۇشىن ەكونوميكانى ءارتاراپتاندىرۋ كەرەك. ياعني شيكىزات ەكسپورتىنا ارقا سۇيەگەن ەكونوميكادان كەتۋىمىز كەرەك»، - دەدى ساراپشى.

ەسكە سالساق، مەملەكەت باسشىسى كەڭەيتىلگەن كەڭەستە قازاقستان كەيىنگى 10 جىلدا «ورتاشا تابىستىڭ تۇزاعىنا» تاپ بولعانىن ايتقان بولاتىن.

ونىڭ سوزىنشە، رەفورمالار شىنايى سيپات الىپ، ساۋاتتى جۇرگىزىلسە، بۇل تۇزاقتان 6-7 جىلدىڭ ىشىندە سىتىلىپ شىعۋعا بولادى.

«بۇل باعىتتا العاشقى قادام جاسادىق تا. ءبىراق ول قادام ماردىمسىز بولىپ جاتىر. مىسالى، پاندەميا كەزىندە قازاقستاننىڭ قايتا وڭدەۋ سالاسى ەل تاريحىندا العاش رەت تاۋ-كەن وندىرىسىنەن كوپ ءونىم بەردى. قازىر تاۋ-كەن سەكتورى قايتا باسىمدىققا شىقتى. ءبىراق ءوسىمى تىم باياۋ. دامۋ كورسەتكىشتەرى ريەۆوليۋتسيالىق دەڭگەيدە بولۋ ءۇشىن بىزگە ريەۆوليۋتسيالىق قادامدار كەرەك»، - دەدى اندرەي چەبوتاريەۆ.

سونداي-اق، ول ەل اراسىندا ۇكىمەتتىڭ ەلدە ءتيىمدى زاۋىتتار سالماي جاتقانىن سىنايتىندار كوپ ەكەنىن ايتادى.

«ۇكىمەت نارىقتىق ەكونوميكا جاعدايىندا وزدىگىنەن زاۋىت اشىپ، ەلەكتر ستانسالارىن سالا المايدى. بۇل بيزنەستىڭ جۇمىسى. بيلىك سوعان اشىق «ويىن ەرەجەسىن» ۇسىنۋى كەرەك. ەكىنشىدەن، ينۆەستور اكەلىپ، كەپىلدىك بەرۋى شارت. قازىر اۋقىمدى ينۆەستيتسيا تارتىپ جاتقانىمەن ريەۆوليۋتسيالىق سەرىپىلىس جاساۋعا جەتپەي تۇر»، - دەيدى ساراپشى.

اندرەي چەبوتاريەۆ ەلىمىزدە بازالىق مولشەرلەمەنىڭ %16,75 بولىپ تۇرۋى بيزنەسكە بەرىلەتىن نەسيەنىڭ پايىزدىق مولشەرلەمەسىنە اسەر ەتىپ وتىرعانىن ەسكە سالدى.

«شاعىن جانە ورتا بيزنەس كوبىندە عيمارات پەن قويما جالداپ جۇمىس ىستەيدى. وندا تۇرعنا ەشتەڭە جوق، قالىپتى جاعداي. ءبىراق يەلىگىندە ونداي مۇلىكتىڭ بولماۋى ونىڭ بانكتەردەن نەسيە الۋ مۇمكىندىگىن توقمەندەتەدى»، - دەدى اندرەي چەبوتاريەۆ.