استاناعا كەلگەن جاڭاوزەندىك مۇنايشىلار بىلتىر دا قازمۇنايگاز عيماراتى الدىندا نارازىلىق وتكىزگەن

استانا. قازاقپارات - «قازمۇنايگاز» ۇلتتىق كومپانياسىنىڭ باسقارما ءتوراعاسى ماعزۇم مىرزاعاليەۆ ۇكىمەتتىڭ كەڭەيتىلگەن كەڭەسىنەن كەيىن جاڭاوزەندىك مۇنايشىلاردىڭ ەرەۋىلى جايىندا پىكىر ءبىلدىردى، دەپ حابارلايدى قازاقپارات ءتىلشىسى.

«بۇل جولى كەلگەن مۇنايشىلاردىڭ 19 ى بىلتىر ءبىزدىڭ عيماراتتىڭ الدىنا كەلىپ، باسقا ءبىر كومپانيانىڭ مۇددەسىن قورعاپ كەتكەن بولاتىن. بيىل ودان باسقا كومپانيانىڭ مۇددەسىن قورعاۋعا كەلىپتى. بىلتىر ولاردى جۇمىستان شىعارىپ تاستاعان كومپانيا بيىل ولاردى جۇمىسقا الۋعا نيەت ءبىلدىردى. بۇلار عانا ەمەس، ءبىز باسشىلارىن كەزدەسۋگە شاقىرعان 2-3 كومپانيانى دا مىسال رەتىندە ايتا الام. مەنىڭ ويىمشا، بۇل كيكىلجىڭنىڭ كونسترۋكتيۆتى سيپاتى جوق. تەندەرگە قاتىسۋشى تاراپ پەن «وزەنمۇنايگاز» اراسىندا قايشىلىق بار»، - دەدى ول.

ماعزۇم مىرزاعاليەۆ بۇل ماسەلە زاڭ اياسىندا شەشىلۋى كەرەكتىگىن ايتتى.

«ول كونكۋرسقا 7 ۇيىم قاتىسقان. سونىڭ ىشىندە ەرەۋىلگە كەلگەن مۇنايشىلار ءسوز سويلەپ جۇرگەن كومپانيا ەڭ جوعارى باعا ۇسىنعان. سوندىقتان باسقا كومپانيا جەڭىسكە جەتتى. انا كومپانيا «سامۇرىق- قازىناعا» جۇگىندى. «سامۇرىق- قازىنا» سونىڭ نەگىزىندە تەكسەرۋ جۇرگىزىپ، كونكۋرس زاڭدى وتكەنى تۋرالى قورىتىندى شىعاردى. سوندا دا «وزەنمۇنايگاز» تەندەردى ۇتقان كومپانيا مەن ەرەۋىلگە كەلگەن مۇنايشىلار اراسىندا كەلىسسوز جۇرگىزدى. كەلىسسوز ءالى ءجۇرىپ جاتىر. ءبىراق ول ادامدار ۇسىنعان جۇمىسقا شىعۋدان باس تارتىپ وتىر. بۇل ءتۇرلى ويعا جەتەلەيدى. شىنىمەن جۇمىس كەرەك بولسا، ۇسىنعان شارتقا كەلىسىڭىزدەر. ونىڭ ۇستىنە 3 جىلدىق ەڭبەك شارتىن ۇسىناتىنىمىزدى ايتىپ وتىرمىز»، - دەيدى «قازمۇنايگاز» باسشىسى.