كولىگىن گازعا اۋىستىرىپ جاتقاندار تاياۋدا ونىڭ دا قىمباتتايتىنىن ەستەن شىعارماسىن - مينيستر
«قازىردىڭ وزىندە كولىكتى بەنزين مەن ديزەلدىڭ ورنىنا سۇيىتىلعان گاز تۇتىناتىن ەتىپ قايتا جاراقتاۋ بەلەڭ العانىن كورىپ وتىرمىز. ونىڭ ۇستىنە قازاقستاندا گاز ءوندىرىسى ايتارلىقتاي شەكتەۋلى. ءبىز ىشتەگى سۇرانىستى «تەڭىزشيەۆرويل» كومپانياسىنا جىل سايىن ءوتىنىش تاستاپ، ەكسپورتقا ارنالعان گازدى ىشكى نارىققا قايتا باعىتتاتۋ ەسەبىنەن جاۋىپ كەلە جاتقانىمىزدى بىلەسىزدەر. بۇرىن بۇل از مولشەردە بولسا، قازىر بارعان سايىن ارتىپ كەلەدى - تەك ىشكى تاپشىلىقتى جابۋ ءۇشىن عانا ونداعان مىڭ توننا گاز قايتا باعىتتالادى. سول باياعى پروبلەما، ءبارى باعاعا كەلىپ تىرەلەدى. وزىندىك قۇنى ليترىنە 70 تەڭگە بولسا، قازىر 50 تەڭگەدەن ساتىلىپ جاتىر. كومپانيالار كوپە- كورىنەۋ شىعىنمەن جۇمىس ىستەپ وتىر. سالىستىرىپ ايتساق، رەسەيدەگى گاز باعاسى 2 ەسە جوعارى - 120 تەڭگە. تاجىكستاندا 177 تەڭگە. ولاردا باعا شىنىمەن نارىق زاڭى بويىنشا قالىپتاسقان. الەمدەگى تاجىريبەگە قاراساق، گازدى ارتىعىمەن وندىرەتىن ەلدەردە سۇيىتىلعان گازدى كولىك جانارمايى رەتىندە پايدالانۋدى ىنتالاندىرۋ ءۇشىن بەنزين باعاسىنىڭ %70 كولەمى مولشەرىندە باعا بەلگىلەيدى. مۇندايدى اقىلعا قونىمدى ەكونوميكالىق تەتىك دەپ قاراۋعا بولادى. ال بىزدە الشاقتىق بارشىلىق. قازىر كولىگىن گازعا اۋىستىرىپ جاتقان ازاماتتار ەرتەڭ ونىڭ دا باعاسى قىمباتتايتىنىن ءتۇسىنۋ كەرەك. وعان سەبەپ جەتىپ جاتىر. گاز تاپشىلىعىنا بايلانىستى ەكونوميكالىق فاكتورلار دا بار. كەلەشەكتە گاز قىمبات باعامەن يمپورتتالۋى مۇمكىن. نەمەسە وزىمىزدەگى گازدى ىشكى نارىققا ەكپورتتىق باعاسىمەن باعىتتاۋ قاجەت بولادى»، - دەدى ول.
الماسادام ساتقالييەۆ ناقتى باعانى بەلگىلەۋ ماسەلەسى باسەكەلەستىكتى قورعاۋ جانە دامىتۋ اگەنتتىگىنىڭ قۇزىرىندا ەكەنىن ايتتى
«العاشقى باعا ءوسىمى ەلەۋسىز بولاتىنى تۇسىنىكتى. جاعدايعا بايلانىستى 5-10 تەڭگە كولەمىندە بولاتىن شىعار دەپ ويلايمىن. ءبىراق كەيىن وزىندىك قۇنىن اقتايتىنداي باعاعا شىعامىز. مەملەكەت باسشىسى وسى كەزەڭدى انىقتاۋدى تاپسىردى. ۇكىمەتپەن، باسەكەلەستىك قورعاۋ جانە دامىتۋ اگەنتتىگىمەن، دەپۋتاتتارمەن بىرگە وسى كەزەڭدى بەلگىلەپ الساق، 3 جىلدىڭ ىشىندە، مۇمكىن 2 نەمەسە 4 جىلدىڭ ىشىندە سۇيىتىلعان گازدىڭ نارىقتىق باعاسىنا كوشەمىز»، - دەدى مينيستر.
جۋرناليستەر سۇيىتىلعان گاز باعاسى قاشان 5-10 تەڭگە ارالىعىندا قىمباتتايتىنىن سۇرادى.
«ەڭ جاقىن ارادا بولۋى مۇمكىن. الداعى ءبىر، ەكى نەمەسە ءۇش ايدىڭ كولەمىندە بولادى. بۇل گازدىڭ وزىندىك قۇنى 70 تەڭگەدەن اساتىنىن ايتتىم. ونىڭ ۇستىنە قانداي دا ءبىر تابىس بولۋى كەرەك قوي. حالىقارالىق تاجىريبەدە تابىستىلىق دەڭگەيى %15 بولسا، قالىپتى دەپ ەسەپتەلەدى. ال ءبىز تىم بولماعاندا 5% تابىستىلىق دەڭگەيىنە شىقساق دەپ وتىرمىز. سوندا اكتسيونەرلەر قانداي دا ءبىر تابىس كورىپ، ينۆەستيتسيا تۋرالى ويلانا الار ەدى»، - دەدى ۆەدومستۆو باسشىسى.
