توقايەۆ: بالالارعا قاتىستى جانتۇرشىگەرلىك قىلمىستار جيىلەپ كەتتى

استانا. قازاقپارات - مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن كەڭەسىندە بالالارعا قاتىستى جانتۇرشىگەرلىك قىلمىستار جيىلەپ كەتكەنىنە الاڭدايتىنىن ءبىلدىردى، دەپ حابارلايدى قازاقپارات ءتىلشىسى.

«تاعى ءبىر نازار اۋداراتىن ماسەلە - جاس ۇرپاقتىڭ قاۋىپسىزدىگى. بالالارعا قاتىستى جانتۇرشىگەرلىك قىلمىستار جيىلەپ كەتتى. مۇنداي وقيعالار مەكتەپتە، كوشەدە، ءتىپتى، ۇيدە بولىپ جاتىر. سوراقى جاعدايلار وقۋشىلاردىڭ وزىنە قول جۇمساۋىنا سەبەپكەر بولىپ وتىر»، - دەدى مەملەكەت باسشىسى.

پرەزيدەنت مۇنىڭ ءبىر سەبەبى وتباسىنداعى زورلىق-زومبىلىقتان تۋىنداپ جاتقانىن ەسكە سالدى.

«ءتىپتى اتا-انالاردىڭ وزدەرى بالاسىنا قورلىق كورسەتىپ، ونىڭ ارتى قايعىلى جاعدايعا ۇلاسىپ جاتادى. وتباسىنداعى زورلىق-زومبىلىقتىڭ الدىن الۋ جۇمىسى ءالسىز. جاۋاپتى مەكەمەلەر مەن قۇقىق قورعاۋ ورگاندارىنىڭ قىزمەتى ويداعىداي ناتيجە بەرگەن جوق. تۇرمىستىق زورلىق- زومبىلىقتىڭ الدىن الۋ ساياساتىن قايتا قاراۋىمىز كەرەك.

ايەلدەر مەن بالالاردىڭ قۇقىقتارىن قورعاۋ شارالارىن زاڭمەن كۇشەيتۋ كەرەك. وتباسى قۇندىلىقتارىن دارىپتەۋ ىسىنە ەرەكشە كوڭىل بولگەن ءجون. تاعى دا ەسكەرتەمىن، ءبىز قوعامداعى، كوشەدەگى، ءتىپتى ءار ۇيدەگى قاۋىپسىزدىكتى قامتاماسىز ەتپەسەك، دامىعان ەلدەردىڭ قاتارىنا قوسىلۋىمىز قيىن بولادى. ازاماتتارىمىز ەركىن ءجۇرىپ- تۇراتىن ءقاۋىپسىز قوعام قۇرۋىمىز قاجەت»، - دەدى قاسىم-جومارت توقايەۆ.

ايتا كەتەيىك، ۇكىمەت ۇيىندە پرەزيدەنت توراعالىعىمەن ەلدىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس ءوتىپ جاتىر.