كوكشەتاۋدا جوندەۋدەن وتكەن جولداردىڭ ساپاسى سىن كوتەرمەيدى - انتيكور
كەڭەسكە كوكشەتاۋ قالاسىنىڭ اكىمى باۋىرجان عايسا، وبلىستىڭ سىبايلاس جەمقورلىققا قارسى قىزمەتىنىڭ وكىلدەرى، «ادىلدىك جولى» ر ق ب اتقارۋشى ديرەكتورى ديدار سماعۇلوۆ، دەپۋتاتتار، جۇرتشىلىق وكىلدەرى، مەملەكەتتىك ورگاندار مەن ۇيىم باسشىلارى قاتىستى.
جيىندا سىبايلاس جەمقورلىققا قارسى ءىس-قيمىل دەپارتامەنتى پريەۆەنتسيا باسقارماسىنىڭ باسشىسى جانات تۇرالينوۆ اۆتوجولدار سالاسى وبلىستىڭ سىبايلاس جەمقورلىق تاۋەكەلدەرى كارتاسىنا ەنگىزىلگەنىن، سونداي-اق، كوكشەتاۋ قالاسىنىڭ اۆتوجولدارىن جوندەۋگە جۇرگىزىلگەن مونيتورينگ قورىتىندىسى بويىنشا انىقتالعان ءبىرقاتار كەمشىلىكتى ءمالىم ەتتى.
«قوعامدىق مونيتورينگ انىقتاعانداي، جەكەلەگەن مەردىگەرلىك ۇيىمدار جول جۇمىستارى بويىنشا ءوز مىندەتتەمەلەرىن ءتيىستى تۇردە ورىندامايدى. بۇل رەتتە مەملەكەتتىك ورگاندار اتىنان تاپسىرىس بەرۋشىلەر جۇمىستىڭ ساپالى ورىندالۋىن ءتيىستى باقىلاۋعا المايدى. مىسالى، وتكەن جىلى كاسىپورىنداردىڭ ءبىرى 397 ميلليون تەڭگەگە قالانىڭ كوشە- جول جەلىسىنە ورتاشا جوندەۋ جۇرگىزگەن، الايدا كەيبىر ۋچاسكەلەر بويىنشا جول جامىلعىسىنىڭ شوگۋى جانە جارىقتارى بارى انىقتالدى. كراسنويار اۋىلىندا دا جول جوندەۋ جۇمىسىنىڭ ساپاسىز جاسالعانى بەلگىلى بولدى. وندا جالپى سوماسى 440 ميلليون تەڭگەگە ەكى كومپانيا جۇمىس جۇرگىزگەن»، - دەدى جانات تۇرالينوۆ
سونىمەن بىرگە، ول تاپسىرىس بەرۋشىلەر مەن مەردىگەرلەرگە كەپىلدىك مىندەتتەمەلەرى شەڭبەرىندەگى اقاۋلاردى قىسقا مەرزىمدە جويۋ، سول ارقىلى قانداي دا ءبىر قۇقىق بۇزۋشىلىقتاردى بولدىرماۋ جانە حالىق تاراپىنان سىنعا تۇسۋگە جول بەرمەۋ قاجەتتىگىن اتاپ ءوتتى.
