ارمەنيا قانداي جاعدايدا ازەربايجانمەن بەيبىت كەلىسىمگە كەلەتىنىن ايتتى

ەرەۆان. قازاقپارات - ارمەنيا مەن ازەربايجان ءبىر-ءبىرىنىڭ اۋماقتىق تۇتاستىعىن مويىنداعان جاعدايدا بەيبىت كەلىسىمگە كەلۋى مۇمكىن.

ارمەنيا ازەربايجاننىڭ اۋماقتىق تۇتاستىعىن تولىق مويىندايدى جانە ك س ر و كەزىندەگى كارتانى نەگىزگە الۋدى ۇسىنادى. بۇل تۋرالى پارلامەنتتە ارمەنيا پرەمەر-ءمينيسترى نيكول پاشينيان مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.

«ەگەر ەكى ەل ەكىۇشتى جانە قۇيتىرقى ويسىز ءبىر-ءبىرىنىڭ اۋماقتىق تۇتاستىعىن مويىنداپ، بۇگىن دە، كەيىن دە اۋماققا قاتىستى نارازى بولمايتىنىنا مىندەتتەلسە ارمەنيا مەن ازەربايجان بەيبىت كەلىسىمگە قول جەتكىزۋى مۇمكىن. قازىر مەن ارمەنيا رەسپۋبليكاسى ازەربايجاننىڭ اۋماقتىق تۇتاستىعىن تولىق مويىندايتىنىن راستاعىم كەلەدى جانە ازەربايجان دا ارميان ك س ر اۋماعىن ارمەنيا رەسپۋبليكاسىنا تيەسىلى دەپ مويىنداعانىن كۇتەمىز»، - دەپ مالىمدەدى نيكول پاشينيان 2022-جىلعى ەل ۇكىمەتىنىڭ ەسەبىن ۇسىنا وتىرىپ.

ونىڭ سوزىنشە، فاكت جۇزىندە تاراپتار بۇل تۋرالى 2022-جىلدىڭ 6- قازانىندا پراگادا جانە 2022-جىلدىڭ 31- قازانىندا سوچيدە كەلىسىپ، كەلىسىم جاريا مالىمدەمەدە تىركەلگەن بولاتىن.

«سوعان قاراماستان ەريەۆاننان دا، باكۋدەن دە قارسى تاراپتى كەلىسىمدى ورىندامادى دەپ ايىپتايتىن رەسمي مالىمدەمە جاسالدى. سونداي-اق ارمەنيا بەيبىت كەلىسىم كەزىندە ازەربايجاننىڭ اۋماقتىق تۇتاستىعىن مويىنداۋدان باس تارتتى نەمەسە باس تارتادى دەگەن پىكىرلەر - جالعان، ءبىز ونى دالەلدەي الامىز. ءبىز ءوزىمىز بەيبىتشىلىك تۋرالى كەلىسىمگە ەكى ەلدىڭ اۋماقتىق تۇتاستىعىن مويىنداۋ نەگىزى رەتىندە كسرو دايىنداپ، بەكىتكەن ارميان مەن ازەربايجان ك س ر كارتاسىن ەنگىزۋدى ۇسىنعانبىز»، - دەپ اتاپ ءوتتى نيكول پاشينيان.