حالىقارالىق ساراپشىلار قازاقستانداعى كيىك مەكەندەرىندە زەرتتەۋ جۇرگىزەدى
بۇل جايىندا پرەمەر- مينيستر ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا ايتتى، دەپ حابارلايدى قازاقپارات ءتىلشىسى.
«جالپى، ەلىمىزدەگى كيىكتەردىڭ سانىن رەتتەۋدىڭ، ونىڭ ىشىندە ولاردىڭ پوپۋلياتسياسىنا مونيتورينگ جۇرگىزۋدىڭ، سونداي- اق عىلىمي جانە وندىرىستىك ماقساتتاردا الىپ قويۋدىڭ عىلىمي- نەگىزدەلگەن ءتاسىلى ءۇشىن اعىمداعى جىلى ولاردىڭ پوپۋلياتسياسىن باسقارۋ جونىندەگى بيولوگيالىق نەگىزدەمە شەڭبەرىندە عىلىمي زەرتتەۋدى باستاۋ جوسپارلانعان»، - دەپ جازادى ول.
ۇكىمەت باسشىسنىڭ ايتۋىنشا، سول زەرتەۋ اياسنىدا 28-اقپان مەن 1-ناۋرىز ارالىعىندا قازاقستانداعى كيىك پوپۋلياتسياسىن باسقارۋ ماسەلەسى جونىندەگى حالىقارالىق جانە ۇلتتىق ساراپشىلاردىڭ قاتىسۋىمەن كونسۋلتاتيۆتى كەڭەستىڭ ءبىرىنشى جيىنى وتكەن.
«كونسۋلتاتيۆتىك كەڭەستىڭ ەكىنشى كەزەڭىندە 24-28-مامىر ارالىعىندا كيىكتەردىڭ مەكەندەيتىن جەرلەرىنە بارىپ زەرتتەۋ جۇرگىزۋ جوسپارلانعان. وتكىزىلگەن كونسۋلتاتيۆتىك كەڭەستەردىڭ قورىتىندىسى بويىنشا حالىقارالىق جانە ۇلتتىق ساراپشىلار قازاقستانداعى كيىكتەر پوپۋلياتسياسىن ودان ءارى باسقارۋ جونىندە ۇسىنىمدار ازىرلەيدى. ولار جوسپارلانعان بيولوگيالىق نەگىزدەمەدە كورسەتىلەدى. جوعارىدا اتالعان زەرتتەۋلەر شەڭبەرىندە نورمالاردى وزەكتەندىرۋ تۇرعىسىنان قولدانىستاعى زاڭناماعا تالداۋ جۇرگىزۋ، سونداي- اق كيىكتەردىڭ دەريۆاتىن (ءمۇيىزىن) قايتا وڭدەيتىن زاۋىت سالۋ جانە شارۋا قوجالىقتارى ءۇشىن ەگىس الاڭدارى مەن شابىندىقتاردىڭ اينالاسىندا قورشاۋ سالۋعا مەملەكەت قاراجاتىن سۋبسيديالاۋ ماسەلەسىن ەگجەي- تەگجەيلى پىسىقتاۋ كوزدەلىپ وتىر»، - دەپ جازادى پرەمەر- مينيستر.
