تارازدا ەكى بالانى قۇتقارعان پوليتسيا ينسپەكتورى ماراپاتتالدى

تاراز. قازاقپارات - توتەنشە جاعدايلار ءمينيسترى يۋري يليننىڭ بۇيرىعىمەن تاراز قالاسى پوليتسيا باسقارماسىنىڭ كامەلەتكە تولماعانداردىڭ ىستەرى جونىندەگى ۋچاسكەلىك پوليتسيا ينسپەكتورى قايرات تۇرلىبايەۆ مۇز استىنا تۇسكەن ەكى بالانى قۇتقارعانى ءۇشىن ماراپاتتالدى، دەپ حابارلايدى قازاقپارات ءتىلشىسى.

ماراپاتتاۋ ءراسىمى جامبىل وبلىستىق توتەنشە جاعدايلار دەپارتامەنتىندە ءوتتى. قايرات تۇرلىبايەۆ «سۋعا باتقانداردى قۇتقارعانى ءۇشىن» مەدالىمەن ماراپاتتالدى.

ەستەرىڭىزگە سالا كەتەيىك، بيىل 31-ناۋرىزدا بۇقارالىق اقپارات قۇرالدارىندا ۋچاسكەلىك پوليتسەيدىڭ ەرلىگى تۋرالى ماقالا جاريالانعان بولاتىن.

2022 -جىلدىڭ 28-جەلتوقسانىندا قايرات تۇرلىبايەۆ تارازدا ساڭىراق باتىر كوشەسىندەگى كانال جانىنان ءوتىپ بارا جاتىپ، كولىگىنىڭ اشىق تەرەزەسىنەن بالالاردىڭ كومەك سۇراپ ايعايلاعانىن ەستيدى. «كومەككە شاقىرعان داۋىستى ەستىگەن بويدا ويلانباستان كولىگىمنەن شىعىپ، كانالعا قاراي جۇگىردىم. جاقىنداي بەرە، شامامەن 9-10 جاس ارالىعىنداعى ەكى ۇلدىڭ سۋىق سۋ ىشىندە مۇزدىڭ شەتىنەن ۇستاپ، ايعايلاپ جاتقانىن كوردىم»، - دەيدى ول.

پوليتسيا قىزمەتكەرى جىلدام سۋعا ءتۇسىپ، ۇلداردى بىرىنەن سوڭ ءبىرىن شىعارىپ، ۇيلەرىنە اپارادى.

سوسىن سۋ بولعان كيىمدەرىن قايتا اۋىستىرىپ، بولعان وقيعا تۋرالى ەشكىمگە ايتپاستان قىزمەتىن جالعاستىرعان. پوليتسيا قىزمەتكەرىنىڭ باتىل ارەكەتى تۋرالى قۇتقارىلعان ەر بالالاردىڭ اتا- انالارى باق وكىلدەرىنە حابارلاعان.

سولاي، كوپشىلىك ءتارتىپ ساقشىسىنىڭ ەرلىگى تۋرالى ءۇش ايدان كەيىن عانا بىلگەن.