رامازان ايىنداعى سىيلىقتار - الاياقتىقتىڭ جاڭا ءتۇرى شىقتى
«قازىرگى ۋاقىتتا WhatsApp مەسسەندجەرىندە Halyk بانكى اتىنان الاياقتىق حاتتار تاراتىلۋدا. حابارلامادا الاياقتىق سىلتەمە بار. ونى باسقان كەزدە ىقتيمال جابىرلەنۋشى سۇراقتارعا جاۋاپ بەرىپ، جەڭىل ۇتىس ويىنىنا قاتىساتىن سايتقا وتەدى. ال اقشالاي سىيلىقتى الۋ ءۇشىن دوستارىڭىز بەن تۋىستارىڭىزعا سىلتەمەسى بار حابارلاما جىبەرۋىڭىز كەرەك»، - دەلىنگەن بانك تاراتقان اقپاراتتا.
Halyk Bank اقپاراتتىق رەسۋرستاردى قورعاۋ دەپارتامەنتىنىڭ تۇسىندىرۋىنشە، بۇل تاراتۋ فيشينگتىك سحەمانىڭ ءبىرى جانە ونى الاياقتار ازاماتتاردىڭ تەلەفوندارىنا زياندى باعدارلامالاردى جۇكتەپ الۋى ءۇشىن پايدالانادى. ولاردىڭ كومەگىمەن شابۋىلداۋشىلار تەلەفونداعى بارلىق اقپاراتقا، ونىڭ ىشىندە بانكتىك موبيلدى قوسىمشالارعا تولىق قول جەتكىزە الادى. وسىلايشا، قاۋىپتى باعدارلامانى جۇكتەپ الۋ كەزىندە ادام ءوز اقشاسىن جوعالتۋى مۇمكىن.
فيشينگتى الاياقتار پايدالانۋشىلاردىڭ جەكە اقپاراتىن - تەلەفون نومىرلەرىن، جاسىن، اتىن، سونداي-اق تولەم كارتالارىنىڭ دەرەكتەرىن (تولەم كارتاسىنىڭ 16 تاڭبالى ءنومىرى، ونىڭ قولدانىلۋ مەرزىمى، 3 تاڭبالى CVV كودى)، بانكتىك ءموبيلدى قوسىمشالاردىڭ، جەكە شوتتاردىڭ جانە باسقا دا. لوگيندەر مەن پارولدەردى جيناۋ ءۇشىن بەلسەندى پايدالانادى.
«ەگەر پايدالانۋشى نۇسقاۋلاردى ورىنداپ، بەلگىسىز قوسىمشانى ورناتسا نەمەسە كۇماندى سايتقا تولەم كارتاسىنىڭ مالىمەتتەرىن ەنگىزسە، قوسىمشا نۇسقاۋلار الۋ ءۇشىن ءوز بانكىنە شۇعىل تۇردە حابارلاسۋى كەرەك. حالىق بانكى بارىنشا قىراعىلىق تانىتىپ، ەڭبەكپەن تاپقان اقشاڭىزدى جوعالتىپ العانشا، جىبەرىلگەن اقپاراتتى تەكسەرۋگە بىرنەشە مينۋت جۇمساعان دۇرىس ەكەنىن ەستە ساقتاۋعا شاقىرادى. بارلىق اكتسيالار، ۇتىس ويىندارى مەن سىيلىقتار تۋرالى اقپارات ءارقاشان بانكتىڭ رەسمي سايتىندا جانە ونىڭ الەۋمەتتىك جەلىلەرىندە ورنالاستىرىلادى»، - دەپ ەسكەرتەدى بانكتەن.
