باتىل بولىڭىز! ايەل نەدەن ۇيالماۋى ءتيىس؟

استانا. قازاقپارات - قوعامدا بەلگىلەنگەن كەي تالاپتار مەن ستەرەوتيپتەر ايەلدىڭ ءوز-ءوزىن شەكتەۋىنە اكەلەدى.

الايدا باسقالاردىڭ نە ويلايتىنىنا اسا ءمان بەرىپ، كوڭىلىڭىزگە الا بەرسەڭىز، بۇل ءسىزدىڭ ءومىرىڭىزدى قيىنداتىپ جىبەرەدى. مىنا نارسەلەردەن ۇيالماڭىز.

ارتىق سالماقتان ۇيالماڭىز

كوپ ايەل ارتىق سالماق قوسىپ العانىن ۋايىمدايدى. سول ءۇشىن ولار وزدەرىن سەنىمسىز سەزىنەدى. الايدا ءوزىڭىزدى جاقسى كورىپ ۇيرەنۋ ماڭىزدى. ارتىق سالماق ۇيالاتىن نارسە ەمەس.

ماكياجسىز جۇرۋدەن ۇيالماڭىز

كەي قىزدار دالاعا ماكياجسىز شىعۋعا قورقادى. الايدا كوپشىلىك زاماناۋي ايەلدەر سۇلۋلىق ىشتەن شىعاتىنىن ءتۇسىنىپ قويدى، سوندىقتان ولار جاقسى تاماقتانادى، ۇيقىنى قاندىرادى جانە حوببيىنە ۋاقىت بولەدى. وعان قوسا، جابىستىرىلعان نەمەسە ۇزارتىلعان كىرپىك پەن تىرناق ساننەن شىقتى. قازىرگى ترەند - تابيعي سۇلۋلىق پەن ساپالى كۇتىم.

ەتەككىرگە قاتىستى نارسەلەردەن ۇيالماڭىز

كەي ايەلدەر وزدەرىنىڭ فيزيولوگيالىق ەرەكشەلىكتەرىنەن ۇيالادى. ونى جەكە گيگيەناعا ارنالعان تاۋاردى دۇكەننەن ساتىپ الۋ كەزىندە ءجيى بايقاۋعا بولادى. مىسالى، دۇكەنشى ەر ادام بولسا، كوپشىلىك قىز جەكە گيگيەنا قۇرالىن سۇراۋعا ۇيالادى. الايدا ەتەككىردىڭ كەلۋى - تابيعي نارسە، سوندىقتان ودان ۇيالۋدىڭ قاجەتى جوق. ايدىڭ ءاربىر كۇنىندە ءوزىڭىزدى سەنىمدى ۇستاڭىز.

ەموتسيالارىڭىزدى كورسەتۋدەن ۇيالماڭىز

كوپشىلىكتىڭ ميىنا بالالىق كەزدە ەموتسيالاردى كورسەتۋ «دۇرىس ەمەس نەمەسە ۇياتتى» نارسە سەكىلدى قۇيىپ قويعان. باسقالار ول تۋرالى جامان ويلاماسىن دەگەن ماقساتتا كەي ايەلدەر رەنىشتەرىن ىشتە ساقتايدى، جان اۋرۋىنا شىدايدى، اشۋىن ۇستايدى. بۇل دەپرەسسياعا جانە باسقا دا اۋرۋلارعا اكەلۋى مۇمكىن. سوندىقتان كەيدە ەموتسيانى سىرتقا شىعارۋ دا پايدالى. وعان قوسا، ۇنامايتىن نارسەنى بىردەن ايتىپ تاستاعان دۇرىس.

باسقالاردان قۇرمەتتى تالاپ ەتۋدەن ۇيالماڭىز

بالالىق كەزدەن باستاپ قۇرمەتكە لايىق بولۋ كەرەك دەگەندى ءجيى ەستىگەن بولارسىز. ارينە، دۇرىس، ءبىراق بۇل قورلىققا شىداۋ كەرەك دەگەن ءسوز ەمەس. ەگەر ءوزىن سىزدەن جوعارى سانايتىن، سىزگە تۇلعا رەتىندە قارامايتىن ادامدارمەن جولىقساڭىز، ولارعا جەكە شەكاراڭىز جايلى ايتىڭىز نەمەسە ورتاڭىزدى وزگەرتىڭىز.

قوشەمەت سوزدەردى قابىلداۋدان ۇيالماڭىز

قاراپايىم كورىنەمىن دەپ ءوزىڭىزدىڭ ارتىقشىلىقتارىڭىزدى تومەندەتۋدىڭ قاجەتى جوق. بىرەۋ سىزگە قوشەمەت سوزدەر ايتسا، ونى قابىلداپ، «راقمەت» ايتىڭىز. وسىنىڭ ءوزى جەتكىلىكتى.